(ड्राय डे) दिवशी बेकायदेशीररीत्या देशी-विदेशी दारूची चढ्या दामाने विक्री ; लोणी काळभोर पोलीसांची कारवाई..
.
पुणे (हवेली) : महात्मा गांधींच्या पुण्यतिथीनिमित्त आणि देशाच्या स्वातंत्र्यासाठी त्यांच्या योगदानाचा सन्मान करण्यासाठी दरवर्षी ३० जानेवारी रोजी मद्य विक्री (ड्राय डे) करण्यास मनाई असतानाही त्याचा फायदा घेऊन बेकायदेशीररीत्या देशी-विदेशी दारूची चढ्या दामाने विक्री करणाऱ्याला लोणी काळभोर पोलिसांनी रंगेहाथ पकडले आहे. ही कारवाई पोलिसांनी कदमवाकवस्ती (ता. हवेली) ग्रामपंचायत हद्दीतील वीरे दा ढाब्याच्या पाठीमागे शुक्रवारी रात्री आठ वाजण्याच्या सुमारास केली आहे.
या प्रकरणी चक्रधर शिरगीरे यांनी सरकारच्या वतीने दिलेल्या फिर्यादीवरून सागर बसवराज सोनकटले (वय २२, रा. पठारेवस्ती, कदमवाकवस्ती, ता. हवेली, जि.पुणे. मुळ रा. मु.पो. अशलर, ता. लोहारा, जि. धाराशीव) याचेवर गुन्हा दाखल करण्यात आला आहे.
पोलीस सुत्रांनी दिलेल्या माहितीनुसार ‘ड्राय डे’ च्या दिवशी जर कोणी अवैधरित्या दारूची विक्री करीत असेल, तर त्यांच्यावर कडक कारवाई करण्यात यावी, असे आदेश पुणे शहर पोलीस आयुक्त अमितेश कुमार यांनी पोलिसांना दिले होते. मिळालेल्या आदेशानुसार लोणी काळभोर पोलिसांचे तपास पथक लोणी काळभोर पोलीस ठाण्याच्या हद्दीत गस्त घालत होते. पोलीस पथकातील पोलीस अंमलदार चक्रधर यांना एक इसम कदमवाकवस्ती (ता. हवेली) ग्रामपंचायत हद्दीतील वीरे दा ढाब्याच्या पाठीमागे बेकायदा देशी-विदेशी दारूची विक्री करीत आहे, अशी माहिती एका खबऱ्यामार्फत मिळाली. मिळालेल्या माहितीच्या आधारे अनुषंगाने सदर ठिकाणी छापा टाकला. तेथे सागर सोनकटले हा अवैध दारूची विक्री करताना आढळून आला.
पोलिसांनी या कारवाईत दोन हजार रुपयांच्या दारूच्या बाटल्या जप्त केल्या असून सोनकटले याच्यावर महाराष्ट्र दारुबंदी कायदा कलमान्वये गुन्हा दाखल करण्यात आला आहे. ही कामगिरी लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक अनिल जाधव, पोलीस हवालदार गणेश सातपुते, पोलीस अंमलदार चक्रधर शिरगिरे व त्यांच्या सहकाऱ्यांनी केली आहे.
