टी-२० वर्ल्डकप २०२६चे वेळापत्रक जाहीर; ७ फेब्रुवारीपासून क्रिकेटचा महासंग्राम सुरू, भारत–पाक भिडत १५ फेब्रुवारीला…
मुंबई : जगभरातील क्रिकेटप्रेमींनी प्रतीक्षा केलेल्या आयसीसी टी-२० वर्ल्डकप २०२६च्या वेळापत्रकाची अखेर घोषणा करण्यात आली आहे. आयसीसीने २५ नोव्हेंबर रोजी संध्याकाळी ही अधिकृत घोषणा करताच क्रिकेटविश्वात उत्साहाचे वातावरण निर्माण झाले. पुढील वर्षी ७ फेब्रुवारी ते ८ मार्च २०२६ या कालावधीत हा क्रिकेटचा महाकुंभ भारत आणि श्रीलंका यांच्या संयुक्त यजमानपदाखाली रंगणार आहे.
हायव्होल्टेज भारत–पाक सामना १५ फेब्रुवारीला…
या वर्ल्डकपमधील सर्वाधिक प्रतीक्षित सामना म्हणजे भारत विरुद्ध पाकिस्तान. हा रोमांचक सामना १५ फेब्रुवारी रोजी कोलंबोतील प्रेमदासा स्टेडियममध्ये खेळवला जाणार असून, तिकीटविक्रीपासून सुरक्षेपर्यंत मोठी तयारी सुरु झाली आहे.
भारतीय संघासमोर इतिहास रचण्याची संधी
टी-२० वर्ल्डकपचे आयोजन यापूर्वी नऊ वेळा पार पडले आहे. पहिल्या पर्वात २००७ मध्ये भारताने पाकिस्तानचा पराभव करून विजेतेपद पटकावले होते, तर २०२४ मध्ये दक्षिण आफ्रिकेला हरवून दुसरा किताब मिळवला. मात्र अद्यापपर्यंत कोणत्याही संघाला सलग दुसऱ्यांदा विजेतेपद राखता आलेले नाही. त्यामुळे या वेळी सूर्यकुमार यादवच्या नेतृत्वाखाली भारतीय संघाला इतिहास घडवण्याची सुवर्णसंधी मिळणार आहे.
रोहित शर्मा बनला वर्ल्डकपचा चेहरा
बीसीसीआय सचिव जय शहा यांनी या स्पर्धेचा ब्रँड अॅम्बेसिडर म्हणून रोहित शर्माची निवड झाल्याची घोषणा केली. रोहितवर प्रमोशनपासूनज्ञजनजागृतीपर्यंत महत्त्वाची जबाबदारी सोपवण्यात आली आहे.
२० संघ, ४ ग्रुप – कोण कुठे?
या स्पर्धेत एकूण २० देश सहभागी होणार असून त्यांची विभागणी खालीलप्रमाणे—
ग्रुप ए – भारत, पाकिस्तान, यूएसए, नेदरलँड्स, नामिबिया
ग्रुप बी – ऑस्ट्रेलिया, श्रीलंका, आयर्लंड, झिम्बाब्वे, ओमान
ग्रुप सी – इंग्लंड, वेस्ट इंडीज, बांगलादेश, नेपाळ, इटली
ग्रुप डी – न्यूझीलंड, दक्षिण आफ्रिका, अफगाणिस्तान, कॅनडा, यूएई
सामने कुठे होणार?
एकूण आठ मैदानांवर सामने होणार असून त्यातील पाच भारतात आणि तीन श्रीलंकेत असतील.
भारतातील स्थळे :
वानखेडे स्टेडियम, मुंबई
अरुण जेटली स्टेडियम, नवी दिल्ली
एम. ए. चिदंबरम स्टेडियम, चेन्नई
नरेंद्र मोदी स्टेडियम, अहमदाबाद
ईडन गार्डन्स, कोलकाता
श्रीलंकेतील स्थळे :
प्रेमदासा स्टेडियम, कोलंबो
सिंहली स्पोर्ट्स क्लब, कोलंबो
पल्लेकेले इंटरनॅशनल स्टेडियम, कँडी
काउंटडाउनला सुरुवात…
वेळापत्रक जाहीर झाल्यानंतर तिकीट बुकिंग, प्रवास, चाहतावर्गाचे नियोजन आणि संघांच्या रणनीतींना वेग येणार आहे. क्रिकेटप्रेमींच्या नजरा आता ७ फेब्रुवारीकडे लागल्या असून, क्रिकेटचा थरारक सोहळा उपखंडात रंगणार असल्याने उत्साह अभूतपूर्व आहे.
Editer sunil thorat
