पुण्यात दामिनी पथकाने दाखवली तत्परता; औषध सेवन आणि उडी मारण्याच्या तयारीत असलेल्या दोन तरुणींना वेळेत थांबवून दिले नवे जीवन…
महिलांच्या सुरक्षेबरोबरच जीवनरक्षक ठरले दामिनी मार्शल; कोथरूडमध्ये दोन आत्महत्या थांबवत संकटग्रस्त तरुणींचे प्राण वाचवले...
पुणे : पुणे शहर पोलिसांचे दामिनी पथक हे फक्त महिलांच्या सुरक्षेसाठी नव्हे, तर संकटसमयी जीवनरक्षक कवच ठरत असल्याचे पुन्हा एकदा सिद्ध झाले आहे. कोथरूड पोलिस ठाण्याअंतर्गत कार्यरत असलेल्या दामिनी मार्शलने आत्महत्येच्या वाटेवर असलेल्या दोन उच्चशिक्षित महिलांचे प्राण वाचवले आहेत. त्यांच्या या धाडसी व संवेदनशील कामगिरीचे सर्वत्र कौतुक होत आहे.
कोथरूडमधील करिष्मा सोसायटी येथे राहणाऱ्या २६ वर्षीय तरुणीने नैराश्यातून औषधांचे सेवन केले होते. दामिनी पथकातील पोलीस शिपाई श्रुती कढणे आणि आरती जाधव यांना ही माहिती मिळताच त्यांनी तातडीने घटनास्थळी धाव घेतली. तरुणीला रुग्णालयात दाखल करून वेळेत उपचार मिळवून दिले. तसेच तिला धीर देत समजूत काढत आत्महत्येच्या मार्गावरून परावृत्त केले. घटस्फोटामुळे निर्माण झालेल्या मानसिक तणावातून तिने हे टोकाचे पाऊल उचलले होते.
दुसऱ्याच दिवशी मयूर कॉलनी परिसरात आणखी एक घटना घडली. कौटुंबिक कारणांमुळे नैराश्य आलेल्या तरुणीने तिसऱ्या मजल्यावरून उडी मारण्याची तयारी केली होती. या वेळीही दामिनी पथकाने योग्य वेळी हस्तक्षेप करून तिला समजावून सुरक्षितपणे आई-वडिलांकडे सुपूर्द केले. “प्रत्येक अडचणीला मार्ग असतो, स्वतःचा जीव घेणे चूक आहे,” असे सांगत या तरुणीचा जीव वाचवण्यात आला. ही संपूर्ण कारवाई वरिष्ठ पोलीस निरीक्षक संदीप देशमाने यांच्या मार्गदर्शनाखाली करण्यात आली.
श्रुती कढणे – बॉक्सिंग पदक विजेत्या व मार्गदर्शक..
या मोहिमेत सहभागी झालेल्या श्रुती कढणे या राष्ट्रीय स्तरावरील सुवर्णपदक विजेत्या बॉक्सिंग खेळाडू आहेत. आपल्या अनुभवाचा उपयोग करून त्या शाळा–कॉलेजमधील मुलींना सेल्फ डिफेन्सचे मार्गदर्शन करतात. महिलांशी, विद्यार्थिनींशी व जेष्ठ नागरिकांशी सतत संवाद साधून जनजागृतीचे कार्यही त्या करत आहेत.
समाजोपयोगी उपक्रमांतून महिलांना बळ…
पुणे शहर पोलिसांचे दामिनी मार्शल पथक केवळ कायदा व सुव्यवस्था राखत नाही, तर महिलांच्या सुरक्षेसाठी अनेक स्तुत्य उपक्रम राबवते. शाळा–कॉलेजांमध्ये जाऊन गुड टच – बॅड टच, पॉस्को कायद्याविषयी माहिती याबाबत जनजागृती केली जाते. त्याचबरोबर आत्मसंरक्षणाचे प्रशिक्षण देऊन तरुणींना सक्षम करण्याचे कामही दामिनी पथक करते. समाजातील विविध स्तरांतील महिला, विद्यार्थिनी व जेष्ठ नागरिकांशी सातत्याने संवाद साधून सुरक्षा व विश्वासाचे वातावरण निर्माण करण्यात हे पथक यशस्वी ठरत आहे.
Editer sunil thorat
