हवेली तालुक्यातील २२ सायकलपटूंचा ऐतिहासिक पराक्रम ; दहा दिवसांत १ हजार ६१० किलोमीटर सायकल प्रवास करून गाठले जगन्नाथ पुरी…
तुळशीराम घुसाळकर
लोणी काळभोर (ता. हवेली) : ध्येय डोळ्यासमोर ठेऊन कठोर परिश्रम, शिस्त, संघभावना आणि प्रबळ इच्छाशक्ती असेल, तर कोणतेही अंतर अशक्य ठरत नाही, हे हवेली तालुक्यातील २२ सायकलपटूंनी प्रत्यक्ष कृतीतून दाखवून दिले आहे. पुणे ते ओडिशातील श्री क्षेत्र जगन्नाथ पुरी या तीर्थक्षेत्रापर्यंतचा सुमारे १ हजार ६१० किलोमीटरचा प्रदीर्घ, कठीण आणि आव्हानात्मक सायकल प्रवास अवघ्या दहा दिवसांत पूर्ण करून या सायकलपटूंनी पुणे जिल्ह्याच्या इतिहासात नवा अध्याय लिहिला आहे.
ही सायकलवारी सह्याद्री सायकल रायडर्स या सामाजिक व क्रीडा भावनेतून कार्यरत असलेल्या समूहाच्या वतीने आयोजित करण्यात आली होती. या समूहातील सर्व सायकलपटू हे कदमवाकवस्ती, शेवाळवाडी व हडपसर परिसरातील रहिवासी आहेत. शारीरिक तंदुरुस्ती, मानसिक सक्षमतेबरोबरच पर्यावरण संवर्धन, व्यसनमुक्ती, आरोग्य जागृती आणि आध्यात्मिक प्रेरणा हा या मोहिमेचा मुख्य उद्देश होता.
१३ डिसेंबरला पुण्यातून प्रारंभ…
या सायकलवारीस दि. १३ डिसेंबर रोजी पुण्यातून उत्साहात प्रारंभ झाला. पुणे, सोलापूर, बसवकल्याण, हैदराबाद, खम्मम, देवरपल्ली, पिठापुरम, विशाखापट्टणम, कासीबुगा, चिल्का असा महाराष्ट्र, कर्नाटक, तेलंगणा, आंध्र प्रदेश आणि ओडिशा या पाच राज्यांतून सायकल प्रवास करत दि. २२ डिसेंबर रोजी हे सर्व सायकलपटू श्री जगन्नाथ पुरी येथे पोहोचले.
दिवसाला सरासरी १६० किलोमीटरचा थकवणारा प्रवास…
या दहा दिवसांच्या प्रवासादरम्यान सायकलपटूंनी दररोज सरासरी १६० किलोमीटर अंतर पार केले. उन्हाची तीव्रता, बदलते हवामान, अवघड रस्ते, महामार्गावरील वाहतूक, शारीरिक थकवा आणि तांत्रिक अडचणी यांचा सामना करतानाही त्यांनी एकमेकांना धीर देत प्रवास सुरू ठेवला. कोणतीही दुखापत किंवा मोठा अडथळा न येता संपूर्ण प्रवास पूर्ण करणे, हे त्यांच्या शिस्तीचे आणि नियोजनाचे द्योतक ठरले.
धार्मिक स्थळांना भेट; अध्यात्मिक समाधान…
या मोहिमेदरम्यान सायकलपटूंनी पिठापुरम येथील श्री वल्लभ विठ्ठल मंदिर, श्री सत्यनारायण मंदिर तसेच मार्गावरील इतर धार्मिक स्थळांना भेट देत दर्शन घेतले. त्यामुळे हा प्रवास केवळ शारीरिक कष्टांचा न राहता अध्यात्मिक अनुभूतीचा प्रवास ठरला.
संघभावना आणि परस्पर काळजीचा आदर्श…
या दीर्घ सायकलवारीदरम्यान सर्व सायकलपटूंनी एकमेकांची विशेष काळजी घेतली. कुणालाही त्रास झाला तर संपूर्ण गट थांबून मदत करणे, योग्य विश्रांती, वेळेवर आहार, वाहन नियमांचे पालन आणि सुरक्षिततेला प्राधान्य देत त्यांनी संघभावनेचा आदर्श घालून दिला.
या सायकलवारीत सहभागी सायकलपटू…
या ऐतिहासिक मोहिमेत गिरीश कुलकर्णी, चेतन कोठावडे, महेंद्र भिंडे, युवराज दळवी, योगेश सातव, संदीप डफळ, पूनम रणदिवे, ऋषिकेश पाटील, उमेश टकले, राजकुमार देमान्ना, तेजस फाटक, सुनील बलकवडे, स्नेहल शिनगारे, आनंद देशपांडे, योगेश बिडकर, श्रीकांत तांगुंदे, अश्विन जोगदेव, संदीप म्हस्के, शिवाजी काळे, सुनील दिवे व पंकज जोशी सहभागी झाले होते.
पुरीत पोहोचल्यानंतर दर्शन ; समाधान व्यक्त…
दि. २२ डिसेंबर रोजी श्री क्षेत्र जगन्नाथ पुरी येथे पोहोचल्यानंतर सर्व सायकलपटूंनी प्रभू जगन्नाथाचे दर्शन घेतले. या क्षणी सर्वांच्या चेहऱ्यावर कष्टाचे समाधान आणि यशाचा आनंद स्पष्ट दिसत होता. “हा प्रवास आयुष्यभर लक्षात राहील,” अशी भावना अनेक सायकलपटूंनी व्यक्त केली.
जिल्हाभरातून कौतुकाचा वर्षाव…
हवेली तालुक्यातील या २२ सायकलपटूंनी केलेल्या या विक्रमी कामगिरीचे सामाजिक, राजकीय, शैक्षणिक, क्रीडा व पत्रकारिता क्षेत्रातून मोठ्या प्रमाणात कौतुक होत आहे. युवकांनी आरोग्य, पर्यावरण आणि सकारात्मक जीवनशैलीचा मार्ग स्वीकारावा, यासाठी ही सायकलवारी प्रेरणादायी ठरत आहे.
Editer sunil thorat
