घरफोडी करणारा एकजण जेरबंद ; गुन्हे शाखा युनिट-६ ची उत्कृष्ट कामगिरी…
पुणे : गुन्हे शाखा युनिट ६ च्या पथकाने मिळालेल्या गोपनीय माहितीच्या आधारे सापळा रचत घरफोडी करणारा एक सराईत आरोपी जेरबंद केला आहे. या कारवाईत पोलिसांनी रु. १.८० लाखांचा सोन्याचा मुद्देमाल हस्तगत केला असून, या गुन्ह्यात आणखी दोन सोनारांचाही सहभाग उघड झाला आहे.
मिळालेल्या माहितीनुसार, दिनांक ०८ ऑक्टोबर २०२५ रोजी युनिट ६ चे सहायक पोलीस निरीक्षक मदन कांबळे, सारंग दळे, ऋषीकेश ताकवणे, सचिन पवार आणि ऋषीकेश व्यवहारे हे गुन्हे प्रतिबंधक गस्तीस होते. त्यावेळी ऋषीकेश ताकवणे व सचिन पवार यांना गोपनीय माहिती मिळाली की, सुफियान मोहम्मद सिद्दीकी अन्सारी (वय २१, रा. भवानी पेठ, पुणे) हा खडक पोलीस स्टेशन गुन्हा क्र. १८९/२०२५, भा.दं.वि. कलम ३०५ अन्वये दाखल प्रकरणातील सोन्याचे बिस्कीट विक्रीसाठी हडपसर येथील भाजी मंडई परिसरात येणार आहे.
यानुसार पथकाने सापळा रचून अन्सारी याला ताब्यात घेतले. त्याची झडती घेतल्यावर त्याच्याकडे १० ग्रॅम व ५ ग्रॅम वजनाची दोन सोन्याची बिस्कीटे, किंमत रु. १,८०,०००/- असा मुद्देमाल सापडला. चौकशीदरम्यान त्याने ६५ ग्रॅम सोन्याचे दागिने विक्रीसाठी जितेंद्र किरणराज ओसवाल (वय ४०, काळेवाडी, पिंपरी) आणि संजय हरेंद्रनाथ मंडल (वय ४६, एम.जी. नगर, पिंपरी) या दोघा सोनारांना दिल्याचे कबूल केले.
पोलिसांनी तत्काळ कारवाई करत या दोघांनाही ताब्यात घेतले असता, त्यांचा गुन्ह्यातील सहभाग स्पष्ट झाला. सर्व आरोपींची वैद्यकीय तपासणी करून त्यांना पुढील तपासासाठी खडक पोलीस ठाण्याच्या ताब्यात देण्यात आले आहे.
ही कारवाई पोलीस उपायुक्त (गुन्हे) निखिल पिंगळे, सहाय्यक पोलीस आयुक्त (गुन्हे-२) राजेंद्र मुळीक यांच्या मार्गदर्शनाखाली प्रभारी पोलीस निरीक्षक वाहीद पठाण यांच्या नेतृत्वाखाली सहा. पोलीस निरीक्षक मदन कांबळे, सारंग दळे, ऋषीकेश ताकवणे, सचिन पवार, ऋषीकेश व्यवहारे आणि सुहास तांबेकर यांच्या पथकाने केली.
गुन्हे शाखा युनिट ६ च्या या धाडसी व वेगवान कारवाईमुळे घरफोडी गुन्ह्यांवर नियंत्रण ठेवण्यात पोलिसांना मोठे यश मिळाले आहे.
Editer sunil thorat
