महिला तलाठ्याचा महिला आयोगाकडे थेट आरोप, मंडल अधिकाऱ्याच्या छळाला कंटाळून तक्रार ; महिनाभरातच भ्रष्टाचाराचा गुन्हा दाखल, संशयाचे सावट मंडल अधिकाऱ्यावर!
पुणे, ता. 8 : हवेली तालुक्यातील महसूल विभागात अधिकाराचा दुरुपयोग, मानसिक छळ आणि महिलांचा अपमान अशा गंभीर आरोपांनी वाद पेटला आहे. कुडजे (ता. हवेली) येथील महिला ग्राम महसूल अधिकारी शारदा पाटील यांनी मंडल अधिकारी भारत रुपनवर यांच्याविरोधात राज्य महिला आयोगाकडे थेट तक्रार दाखल केली आहे.
पाटील यांनी तक्रारीत म्हटले आहे की, रुपनवर हे गेल्या एक वर्षापासून हेतुपुरस्सर मानसिक त्रास, अपमानास्पद वर्तन आणि अशोभनीय वागणूक देत आहेत. कामाच्या नावाखाली पाटील यांना कार्यालयात तासन्तास बसवून ठेवणे, रात्री उशिरापर्यंत थांबवणे, तसेच असभ्य दृष्टिकोन आणि वर्तनाने अपमानित करणे, असे गंभीर आरोप त्यांनी केले आहेत.
विशेष म्हणजे, या तक्रारीनंतर अवघ्या महिन्याभरातच शारदा पाटील यांच्यावर लाचलुचपत प्रतिबंधक विभागाकडून भ्रष्टाचाराचा गुन्हा दाखल करण्यात आला आहे. त्यामुळे या कारवाईमागे ‘बदला घेण्याचा डाव’ असल्याची जोरदार चर्चा महसूल विभागात रंगली आहे.
पाटील यांनी सांगितले की, व्हॉट्सअॅपवर नोटीस पाठवून मंडल अधिकाऱ्यांनी एका तासात सर्व दप्तर घेऊन कार्यालयात बोलावले. रात्री आठपर्यंत थांबवून “शेजारी बसा” असा दबाव टाकण्यात आला. “त्यांची महिलांविषयीची विचारसरणी अत्यंत गलिच्छ आहे,” असे त्यांनी स्पष्टपणे नमूद केले आहे.
याशिवाय, गौणखनिज कारवाईदरम्यान वाहन अडविल्याप्रकरणी जबाबदारी ढकलत रुपनवर यांनी पाटील यांना गुन्हा दाखल करण्यास भाग पाडले. विरोध केल्यावर सर्वांसमोर अपमान केला. पाटील यांनी सांगितले की, रुपनवर यांनी वरिष्ठ अधिकाऱ्यांची आणि राजकीय पदाधिकाऱ्यांची नावे सांगून बेकायदेशीर नोंदी परत घेण्यासाठी दबाव आणला. नायब तहसिलदारांचे नाव वापरूनही फेरफार करण्याचे आदेश दिल्याचा आरोप करण्यात आला आहे.
या सर्व घटनांमुळे शारदा पाटील यांनी महिला आयोगाकडे आपली तक्रार दाखल करत न्यायाची मागणी केली आहे. महसूल विभागात या प्रकरणाने एकच खळबळ उडाली असून, महिला कर्मचाऱ्यांमध्ये “सत्तेच्या खुर्चीचा वापर करून छळ चालतोय का?” असा प्रश्न उपस्थित होत आहे.
दरम्यान, महिला आयोगाने या प्रकरणाची नोंद घेतली असून, मंडल अधिकारी भारत रुपनवर यांची भूमिका संशयाच्या भोवऱ्यात आली आहे. विभागीय तपास सुरू होण्याची शक्यता असून, महसूल खात्यातील या वादाने प्रशासनाच्या प्रतिमेवर प्रश्नचिन्ह निर्माण केले आहे.
Editer sunil thorat
