पुणे-सोलापूर महामार्गावर भीषण अपघात; भरधाव बल्कर मिक्सरची स्विफ्ट डिझायरला धडक, चालक फरार…
उरुळी कांचन : पुणे-सोलापूर राष्ट्रीय महामार्गावर शुक्रवारी (दि. १५ मे) सकाळी झालेल्या भीषण अपघातात एका स्विफ्ट डिझायर कारचे मोठ्या प्रमाणात नुकसान झाले. सोरतापवाडी गावच्या हद्दीत वाकडापूल पेठ नाका परिसरात भरधाव वेगातील बल्कर मिक्सर वाहनाने पाठीमागून जोरदार धडक दिल्याने हा अपघात घडला. सुदैवाने या दुर्घटनेत कोणतीही जीवितहानी किंवा दुखापत झाली नाही. मात्र अपघातानंतर संबंधित मिक्सर चालक घटनास्थळावरून फरार झाल्याने पोलिसांनी त्याच्याविरुद्ध गुन्हा दाखल केला आहे.
याबाबत कैलास भागचंद कटारीया (वय ५७, व्यवसाय सेवानिवृत्त, रा. आदिनाथ सोसायटी, मार्केट यार्ड, पुणे) यांनी उरुळी कांचन पोलीस ठाण्यात फिर्याद दिली आहे. त्यानुसार अज्ञात चालकाविरुद्ध गुन्हा क्रमांक 117/2026 दाखल करण्यात आला असून भारतीय न्याय संहिता कलम 281, 324(5) तसेच मोटार वाहन कायदा कलम 184, 134 आणि 177 अंतर्गत कारवाई करण्यात आली आहे.
पोलिसांनी दिलेल्या माहितीनुसार, कैलास कटारीया हे शुक्रवारी सकाळी सुमारे दहा वाजण्याच्या सुमारास त्यांच्या ताब्यातील स्विफ्ट डिझायर कार (एमएच 12 एक्स क्यू 5256) घेऊन पुणे-सोलापूर महामार्गावरून प्रवास करत होते. ते सोरतापवाडी हद्दीतील वाकडापूल पेठ नाका परिसरात आले असता पाठीमागून भरधाव वेगात येणाऱ्या बल्कर मिक्सर वाहनाने (एमएच 12 टीव्ही 0467) त्यांच्या कारला जोरदार धडक दिली.
मिक्सर चालकाने सुरक्षित अंतर न ठेवता निष्काळजीपणे वाहन चालवल्याने ही धडक इतकी जोरदार होती की, कटारीया यांची कार पुढे असलेल्या बल्कर वाहनाला (एमएच 12 एक्सएम 3728) जाऊन धडकली. त्यामुळे स्विफ्ट डिझायर कारचा पुढील आणि मागील भाग अक्षरशः चेंगरला गेला. गाडीचे बोनेट, इंजिन तसेच इतर भागांचे मोठ्या प्रमाणात नुकसान झाले. अपघातात मिक्सर वाहनाचेही नुकसान झाल्याचे पोलिसांनी सांगितले.
घटनेनंतर परिसरात काही काळ वाहतूक मंदावली होती. स्थानिक नागरिक आणि वाहनचालकांनी घटनास्थळी धाव घेत मदतकार्य केले. मात्र अपघात घडल्यानंतर संबंधित मिक्सर चालक घटनास्थळावरून फरार झाला. त्यामुळे पोलिसांनी त्याचा शोध सुरू केला आहे.
या प्रकरणी उरुळी कांचन पोलीस ठाण्यात गुन्हा दाखल करण्यात आला असून पुढील तपास पोलीस हवालदार गायकवाड करीत आहेत. प्रभारी अधिकारी सचिन वांगडे यांच्या मार्गदर्शनाखाली तपास सुरू आहे.
Editer sunil thorat
