मांजरी (हडपसर) : (दि.२१) समाजातील दिव्यांग घटकांना केवळ सहानुभूती नव्हे, तर स्वावलंबनाची ठोस दिशा देणारा जनाधार दिव्यांग चॅरिटेबल ट्रस्टचा ‘दिव्यांग आधार मेळावा’ मांजरी येथील दिव्यांग कल्याण केंद्रात उत्साहात पार पडला. दीपप्रज्वलनाने कार्यक्रमाची सुरुवात झाली.
प्रास्ताविकात ट्रस्टचे अध्यक्ष दत्तात्रय नन्नावरे यांनी संस्थेमार्फत दिव्यांगांसाठी राबविण्यात येणाऱ्या सामाजिक, शैक्षणिक व आर्थिक सक्षमीकरणाच्या सातत्यपूर्ण उपक्रमांचा आढावा घेतला. दरवर्षी ३ डिसेंबरला जागतिक दिव्यांग दिन साजरा होतो; मात्र याच दिवशी मांजरी येथील ग्रामदैवत मांजराई देवीची यात्रा असल्याने दिव्यांगांना प्रत्यक्ष लाभ देता यावा, या उद्देशाने हा स्वतंत्र मेळावा आयोजित केल्याचे त्यांनी स्पष्ट केले.
या मेळाव्यास शेवाळवाडी ग्रामपंचायतीचे माजी सरपंच राहुल शेवाळे, मांजरी ग्रामपंचायतीचे माजी सरपंच शिवराज घुले, माजी उपसरपंच सुमित घुले, भाजपा महिला आघाडीच्या श्लेशा सुमित घुले, शासन नियुक्त नगरसेवक बाळासाहेब घुले, माजी सदस्या आशाताई आदमाने, ॲड. कृपाल पलुसकर, राष्ट्रवादी काँग्रेस पार्टीचे गजेंद्र मोरे, शैलेंद्र बेल्हेकर, गौरव जाधव, राजेश आरणे, भाजपाचे विद्याधर भोसले, आईसाहेब प्रतिष्ठानचे अध्यक्ष लक्ष्मण भोसले, सामाजिक कार्यकर्ते रविंद्र घुले, ज्येष्ठ नागरिक संघाचे अध्यक्ष नाना भापकर, पुणे कॅन्टोन्मेंट सहकारी बँकेचे संचालक अनिल अबनवे, पोलीस पाटील अमोल भोसले, पितांबर धिवार, मनसेचे कुलदीप यादव यांच्यासह विविध क्षेत्रांतील मान्यवर मोठ्या संख्येने उपस्थित होते.
मेळाव्यात दिव्यांगांसाठी रोजगाराच्या संधी, स्वयंरोजगार आणि स्वावलंबन यावर मार्गदर्शन करण्यात आले. गरजू दिव्यांगांना राहुल शेवाळे यांच्या सौजन्याने मोफत तीनचाकी सायकल, व्हीलचेअर, कुबड्या, वॉकर आदी साहित्याचे वाटप करण्यात आले. तसेच के. टी. पलुसकर पॅरामेडिकल इन्स्टिट्यूट यांच्या सहकार्याने उपस्थित दिव्यांगांची मोफत आरोग्य तपासणी करण्यात आली.
उपस्थित मान्यवरांनी जनाधार दिव्यांग चॅरिटेबल ट्रस्टच्या कार्याचे कौतुक करत, दुर्लक्षित घटकांना मुख्य प्रवाहात आणण्यासाठी ट्रस्टने उचललेली पावले प्रेरणादायी व अनुकरणीय असल्याचे मत व्यक्त केले. माजी उपसरपंच सुमित घुले यांच्या सौजन्याने दिव्यांगांसाठी आयोजित स्नेहभोजनाने या उपक्रमाची सामाजिक बांधिलकी अधिक ठळक झाली.
हा मेळावा दिव्यांगांच्या जीवनात आत्मविश्वास, स्वावलंबन आणि आशेचा नवा प्रकाश निर्माण करणारा ठरला. कार्यक्रम यशस्वी करण्यासाठी ट्रस्टचे पदाधिकारी पृथ्वीराज मस्के, शशिकांत राऊत, आबासाहेब भैरवकर, ओंकार अंकुशे, अभय पाटील, संजय देवरे, अविनाश कुऱ्हाडे, संतोष तोरणे, अनिकेत लवळे, छाया सिताफ, पूजा जगताप, वैशाली ताटे आदींनी परिश्रम घेतले.
Editer sunil thorat
