लोणी काळभोर, (ता. हवेली) : पुणे-सोलापूर राष्ट्रीय महामार्गालगत असलेल्या माळी मळा परिसरात मंगळवारी (ता. ५) सकाळी झालेल्या भीषण स्फोटाने संपूर्ण परिसर हादरला. टँकरवर वेल्डिंगचे काम सुरू असतानाच टाकीत साचलेल्या ज्वलनशील वायूमुळे अचानक स्फोट होऊन एक कामगार गंभीररीत्या भाजला.
जखमीवर पुण्यातील रुग्णालयात उपचार सुरू आहेत. मिळालेल्या माहितीनुसार, ‘भारत वेल्डिंग वर्क्स’ या वर्कशॉपमध्ये सकाळी सुमारे साडेनऊच्या सुमारास टँकरच्या दुरुस्तीचे काम सुरू होते. याच दरम्यान अचानक जोरदार स्फोट झाला. स्फोटाची तीव्रता इतकी प्रचंड होती की शेडचे पत्रे उडून गेले आणि आसपासच्या परिसरात मोठी घबराट पसरली.
या दुर्घटनेत चांद बाबू हा कामगार गंभीर जखमी झाला. स्फोटानंतर तो शेडखाली अडकला होता. घटनेची माहिती मिळताच माजी उपसरपंच राजेंद्र काळभोर, अजय मोरे, अनिरुद्ध मराठे आणि रामा काळे यांनी तातडीने घटनास्थळी धाव घेतली. त्यांनी प्रसंगावधान राखत जखमीला बाहेर काढले आणि तातडीने रुग्णवाहिका बोलावून पुण्यातील रुग्णालयात उपचारासाठी हलवले.
स्फोटामुळे संबंधित टँकरचे मोठे नुकसान झाले असून स्फोटाचा आवाज काही अंतरापर्यंत ऐकू गेला. त्यामुळे परिसरातील नागरिकांमध्ये काही काळ भीतीचे वातावरण निर्माण झाले होते. सुदैवाने या घटनेत अन्य कोणतीही जीवितहानी झाली नाही.
प्राथमिक माहितीनुसार, संबंधित टँकरचा वापर पेट्रोल व डिझेल वाहतुकीसाठी केला जात होता. टाकीत उरलेल्या ज्वलनशील वायूंच्या साठ्यामुळे वेल्डिंगदरम्यान ठिणगी पडून स्फोट झाला असावा, अशी शक्यता व्यक्त केली जात आहे. मात्र नेमके कारण अद्याप स्पष्ट झालेले नाही.
माजी उपसरपंच राजेंद्र काळभोर यांनी सांगितले की, “स्फोटाची तीव्रता अत्यंत भीषण होती. टँकरचा पुढील भाग पूर्णतः जळून गेला असून स्फोटामुळे कामगार वर उडून पडल्याने त्याच्या डोक्यालाही दुखापत झाली आहे. त्याला तातडीने सूर्या हॉस्पिटलमध्ये दाखल करून पुढील उपचारासाठी पुण्यात हलवण्यात आले आहे.”
दरम्यान, या घटनेमुळे औद्योगिक कामकाजादरम्यान सुरक्षेच्या नियमांचे काटेकोर पालन किती आवश्यक आहे, याची पुन्हा जाणीव झाली आहे. स्थानिक प्रशासन व संबंधित यंत्रणांनी घटनेची दखल घेत सखोल चौकशी सुरू केली असून, निष्काळजीपणा आढळल्यास कठोर कारवाई केली जाणार असल्याचे संकेत देण्यात आले आहेत.
Editer sunil thorat
