कदमवाकवस्तीत अवैध दारूचा मोठा पर्दाफाश ; आई-मुलासह तिघांवर गुन्हा, ३५० लिटर हातभट्टी दारू नष्ट…

कदमवाकवस्ती (ता. हवेली) : कवडीपाट (दि.५) परिसरात लोणी काळभोर पोलिसांनी टाकलेल्या धाडीत अवैध गावठी हातभट्टी दारूचा मोठा साठा उघडकीस आला असून तब्बल ३५० लिटर रसायनमिश्रित दारू नष्ट करण्यात आली आहे. या प्रकरणी आई-मुलासह तिघांविरुद्ध गुन्हा दाखल करण्यात आला आहे.

कवडीपाट-कदमवाकवस्ती येथील पत्र्याच्या शेडमध्ये सुरू असलेल्या बेकायदेशीर धंद्यावर पोलिसांनी कारवाई केली. अक्षय बजरंग मुळेकर (वय २४), त्याची आई मंदा मुळेकर (वय ४७) आणि दादा खलसे (रा. उरुळी कांचन, ता. हवेली) अशी आरोपींची नावे आहेत. याप्रकरणी पोलीस अंमलदार प्रविण दडस यांनी सरकारतर्फे लोणी काळभोर पोलीस ठाण्यात फिर्याद दिली आहे.

पोलीस उपनिरीक्षक दिगंबर सोनटक्के यांच्या मार्गदर्शनाखाली पथकाने मंगळवारी सकाळी साडेअकराच्या सुमारास दत्त पार्क परिसरात छापा टाकला. या कारवाईदरम्यान अक्षय मुळेकर आणि मंदा मुळेकर यांना ताब्यात घेण्यात आले. त्यांच्या ताब्यातून ३५ लिटर क्षमतेच्या १० प्लास्टिक कॅनमध्ये साठवलेली उग्र वासाची गावठी दारू जप्त करण्यात आली.

प्राथमिक तपासात ही दारू रसायन मिसळून तयार करण्यात येत असल्याचे निष्पन्न झाले असून ती मानवी आरोग्यास अत्यंत घातक ठरू शकते, अशी माहिती पोलिसांनी दिली. कॅनमधील द्रवातून तीव्र आंबट वास येत असल्याचेही निदर्शनास आले. यातील १८० मिली दारू नमुन्यासाठी जप्त करण्यात आली असून उर्वरित सर्व दारू पंचांसमक्ष जागीच नष्ट करण्यात आली.

दरम्यान, आरोपींनी ही दारू दादा खलसे याच्याकडून विकत आणल्याची कबुली दिली आहे. त्यामुळे या प्रकरणात तिसऱ्या आरोपीचाही समावेश करण्यात आला असून पोलिसांनी त्याचा शोध सुरू केला आहे.

या प्रकरणी आरोपींविरुद्ध भारतीय न्याय संहिता कलम १२३, २७४, २७५, ३(५) तसेच महाराष्ट्र दारूबंदी अधिनियम कलम ६५ (ई), ५, ६६, ८६ अंतर्गत गुन्हा दाखल करण्यात आला आहे.

धडक कारवाईमुळे नागरिकांत समाधान…

लोणी काळभोर परिसरात अवैध दारूविक्रीविरोधात पोलिसांनी उचललेल्या या धडक कारवाईमुळे नागरिकांनी समाधान व्यक्त केले आहे. आरोग्यास धोका निर्माण करणाऱ्या अशा बेकायदेशीर धंद्यांवर कठोर कारवाई करण्याची मागणी नागरिकांकडून होत आहे.

Editer sunil thorat