डीसीपी ऋषिकेश रावले यांच्या कारवाईचा ‘शतक’ पार; ११ महिन्यांत १०३ बांगलादेशी नागरिकांवर कारवाई…

पुणे : शहर पोलिस आयुक्तांच्या आदेशानुसार शनिवारी (२४ मे) रात्री पुणे शहरात विशेष कॉम्बिंग ऑपरेशन राबविण्यात आले. यावेळी फरासखाना पोलिस स्टेशन व खडक पोलिस स्टेशन यांच्या संयुक्त पथकाने बुधवार पेठ परिसरातील सागर बिल्डिंगवर छापा टाकून भारतात बेकायदेशीर वास्तव्य करणाऱ्या ६ बांगलादेशी महिलांना ताब्यात घेतले. त्यांच्या विरोधात पुढील कायदेशीर प्रक्रिया सुरू असल्याची माहिती पोलिसांनी दिली.

पोलिस उपायुक्त (झोन १) ऋषिकेश रावले यांना मिळालेल्या गोपनीय माहितीच्या आधारे ही कारवाई करण्यात आली. चौकशीदरम्यान संबंधित महिलांनी सुरुवातीला ब्युटी पार्लर, शिवणकाम तसेच घरगुती कामासाठी भारतात आणल्याचे सांगितले. मात्र बुधवार पेठेत आल्यानंतर त्या स्वेच्छेने वेश्याव्यवसाय करू लागल्याचे उघड झाले आहे.

या महिलांना भारतात आणणारे दलाल कोण आहेत, त्यांनी सीमा कशी ओलांडली, तसेच प्रवेशासाठी आवश्यक कागदपत्रे कशी मिळवली याचा पोलिसांकडून सखोल तपास सुरू आहे.
ताब्यात घेण्यात आलेल्या महिलांमध्ये कल्पना कमल शेख (वय ३८), राणी रफिक शेख (वय ४२), लकी हालेंग मंडल (वय ४०), पूजा रफिक शेख (वय २०), रुमा जानी शेख (वय ३०) आणि निशी शाहजहान ढाली (वय २९) यांचा समावेश आहे. या सर्व महिला बुधवार पेठ परिसरात वास्तव्यास होत्या. त्यांचे मूळ गाव बांगलादेशातील विविध भागांत असल्याचे तपासात समोर आले आहे.

विशेष म्हणजे, डीसीपी ऋषिकेश रावले यांनी झोन १ चा कार्यभार स्वीकारल्यानंतर अवैधरीत्या वास्तव्यास असलेल्या बांगलादेशी नागरिकां विरोधातील कारवाईला वेग आला आहे. गेल्या ११ महिन्यांत तब्बल १०३ बांगलादेशी नागरिकांना पकडून त्यांच्यावर निर्वासनाची कारवाई करण्यात आली असून, हा आकडा शंभरच्या पुढे गेला आहे.

दरम्यान, डीसीपी ऋषिकेश रावले हे एका महिन्याच्या विशेष प्रशिक्षणासाठी हैदराबाद येथे रवाना होत असून जून अखेर ते पुण्यात परतणार आहेत. त्यांच्या अनुपस्थितीत अतिरिक्त कार्यभार डीसीपी मुख्यालय पी. आर. पाटील यांच्याकडे सोपविण्यात आला आहे.

Editer sunil thorat