पुणे वाहतूक शाखेची मोठी पुनर्रचना ; लोणीकंद, लोणी काळभोर आणि काळेपडळ हे तीन नवे वाहतूक विभाग सुरू…

पुणे, दि. २० : पुणे शहरातील वाढती लोकसंख्या, वेगाने विस्तारत असलेली उपनगरे, वाढलेली वाहनसंख्या आणि वाहतूक कोंडीची समस्या लक्षात घेऊन पुणे शहर पोलीस आयुक्तालयाने वाहतूक शाखेची व्यापक पुनर्रचना केली आहे. या अंतर्गत लोणीकंद, लोणी काळभोर आणि काळेपडळ हे तीन नवीन वाहतूक विभाग सुरू करण्यात आले असून, शहरात आता एकूण ३३ वाहतूक विभाग कार्यान्वित करण्यात येणार आहेत. यासंदर्भातील आदेश पोलीस आयुक्त अमितेश कुमार यांनी जारी केले आहेत.

या पुनर्रचनेसोबतच सर्वसाधारण बदली प्रक्रियेत नव्याने वाहतूक शाखेत नियुक्त झालेल्या अधिकाऱ्यांच्या तात्पुरत्या पदस्थापना जाहीर करण्यात आल्या आहेत. नव्या आदेशानुसार ७१ अधिकारी व कर्मचाऱ्यांना विविध वाहतूक विभाग, वाहतूक नियंत्रण कक्ष (CRO), प्रशासन, नियोजन आणि खटला विभागात जबाबदाऱ्या देण्यात आल्या आहेत.

नवीन विभागांमुळे उपनगरांवर विशेष लक्ष…

गेल्या काही वर्षांत पुण्याच्या पूर्व आणि दक्षिण भागात मोठ्या प्रमाणात नागरीकरण झाले आहे. विशेषतः लोणीकंद, लोणी काळभोर आणि काळेपडळ परिसरात औद्योगिक प्रकल्प, आयटी कंपन्या, गृहनिर्माण संकुले आणि राष्ट्रीय महामार्गावरील वाढलेली वाहतूक लक्षात घेता स्वतंत्र वाहतूक विभागाची गरज निर्माण झाली होती. आता या भागांसाठी स्वतंत्र वाहतूक विभाग कार्यरत झाल्याने वाहतूक कोंडी, अपघात नियंत्रण, नियमांची अंमलबजावणी आणि नागरिकांना तत्काळ सेवा देणे अधिक सुलभ होणार आहे.

प्रमुख वाहतूक विभागांमध्ये नवीन प्रभारी…

नवीन आदेशानुसार वाघोली, येरवडा, विमानतळ, चंदननगर, खडकी, मुंढवा, कोरेगाव पार्क, बंडगार्डन, डेक्कन, शिवाजीनगर, चतुःश्रृंगी, बाणेर, कोथरूड, खडक, विश्रामबाग, फरासखाना, सिंहगड रोड, नांदेड सिटी, सहकारनगर, स्वारगेट, मार्केटयार्ड, दत्तवाडी, भारती विद्यापीठ, कोंढवा, वानवडी, लष्कर, फुरसुंगी, हडपसर, समर्थ आणि वारजे या वाहतूक विभागांमध्ये प्रभारी व सहप्रभारी अधिकाऱ्यांच्या नियुक्त्या करण्यात आल्या आहेत.

नव्याने स्थापन करण्यात आलेल्या लोणीकंद वाहतूक विभागाच्या प्रभारीपदी पोलीस निरीक्षक छगन कापसे, लोणी काळभोर विभागाच्या प्रभारीपदी सहाय्यक पोलीस निरीक्षक एस. बी. जोरे, तर काळेपडळ विभागाच्या प्रभारीपदी सहाय्यक पोलीस निरीक्षक देवेंद्र पवार यांची नियुक्ती करण्यात आली आहे. काळेपडळ विभागासाठी एस. एम. इनामदार यांची सहप्रभारी म्हणून नियुक्ती करण्यात आली आहे.

प्रशासन आणि नियंत्रण कक्षालाही बळ…

वाहतूक नियंत्रण अधिक प्रभावी करण्यासाठी सीआरओ (वाहतूक नियंत्रण कक्ष), प्रशासन, नियोजन, खटला विभाग आणि पोलीस उपायुक्त (वाहतूक) कार्यालयातही स्वतंत्र अधिकाऱ्यांच्या नियुक्त्या करण्यात आल्या आहेत. यामुळे वाहतूक नियोजन, सिग्नल व्यवस्थापन, अपघातांचा आढावा, न्यायालयीन प्रकरणे आणि दैनंदिन प्रशासकीय कामकाज अधिक गतिमान होण्याची अपेक्षा आहे.

वाहतूक व्यवस्थापनात होणार सुधारणा…

या पुनर्रचनेमुळे शहरातील प्रमुख चौक, राष्ट्रीय व राज्य महामार्ग, आयटी पार्क, औद्योगिक क्षेत्रे आणि नव्याने विकसित होणाऱ्या परिसरातील वाहतूक नियंत्रण अधिक प्रभावी होणार आहे. वाढत्या वाहनसंख्येमुळे निर्माण होणारी कोंडी कमी करणे, अपघात रोखणे, वाहतूक नियमांची काटेकोर अंमलबजावणी करणे आणि नागरिकांना जलद व कार्यक्षम सेवा देणे, हा या निर्णयामागील प्रमुख उद्देश असल्याचे पोलीस प्रशासनाने स्पष्ट केले आहे.

नवीन पदस्थापना आदेश तात्काळ प्रभावाने लागू करण्यात आले असून, सर्व संबंधित अधिकाऱ्यांनी नियुक्तीच्या ठिकाणी तत्काळ हजर होऊन कार्यभार स्वीकारण्याचे निर्देशही आदेशात देण्यात आले आहेत. पुणे शहरातील वाहतूक व्यवस्थापन अधिक सक्षम, शिस्तबद्ध आणि नागरिकाभिमुख करण्याच्या दृष्टीने हा निर्णय महत्त्वाचा मानला जात आहे.

Editer sunil thorat