तुळशीराम घुसाळकर / हवेली
पुणे (हवेली) : डंपर व दुचाकी यांच्यात झालेल्या अपघातात एका माजी मुख्याध्यापकाचा जागीच मृत्यू झाला असल्याची घटना पुणे- सोलापूर महामार्गावरील सोरतापवाडी (ता. हवेली) ग्रामपंचायत हद्दीतील श्रेयश प्लीरा नर्सरी समोर रविवारी (१९ जानेवारी) रोजी दुपारी ३.१५ वाजण्याच्या घडली आहे.
या अपघातात खंबेश्वर शिक्षण संस्था खामगाव (ता. दौंड) येथील माजी मुख्याध्यापक संजीव धर्माजी नेवसे (वय ५९ रा फ्लॅट नं सी – २ लक्ष्मी विहार सोसायटी हडपसर) हे मृत्युमुखी पडले आहेत. हा अपघात एवढा भीषण होता की, पाठीमागील भरधाव डंपर त्यांच्या अंगावरून गेल्याने त्यांचा जागीच मृत्यू झाला आहे.
याप्रकरणी भरत संतोष नांदे (वय २२, रा एकता कॉलनी आकाश ठेबे यांची रूम गजानन महाराज मंदीराजवळ, काळेपडळ हडपसर पुणे मुळ रा. राजेबोरगाव ता. जि. धाराशिव) यांनी उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार माजी बॅचच्या एका विद्यार्थिनींच्या पुस्तकाचे प्रकाशनाच्या कार्यक्रमाचे आयोजन उरुळी कांचन येथे करण्यात आले होते. कार्यक्रम झाल्यानंतर त्यांना त्यांच्या एका सहशिक्षकांनी एलाईट चौकात सोडले. यावेळी नेवसे सरांनी हडपसरकडे जाणाऱ्या एका दुचाकीला लिफ्ट मागितली व दोघेजण उरुळी कांचन येथून हडपसरकडे दुचाकीवर निघाले. सोरतापवाडी येथील श्रेयश प्लीरा नर्सरी समोर आले असता त्यांच्या समोर असलेल्या एका चारचाकी गाडीने अचानक ब्रेक दाबला व पाठीमागे बसलेलं नेवसे सर हे महामार्गावर खाली पडले. त्याचवेळी पाठीमागून आलेला डंपर त्यांच्या डोक्यावरून गेला. या घटनेत त्यांचा जागीच मृत्यू झाला आहे. अशी माहिती उपस्थित नागरिकांनी दिली.
या घटनेनंतर सदर डंपर चालक फरार झाला असून त्याच्यावर भरत नांदे यांनी दिलेल्या फिर्यादीवरून उरुळी कांचन पोलीस ठाण्यात अज्ञात डंपर चालकाच्या विरोधात गुन्हा दाखल करण्यात आला आहे. या प्रकरणाचा अधिक तपास पोलीस उपनिरीक्षक प्रवीण कांबळे करीत आहेत.
बातमी / लेख आपल्या मित्रांसोबत शेअर करा
