रिव्हरव्ह्यू सिटीवर गंभीर आरोप ; स्थानिकांचा संताप, दोषींवर गुन्हा दाखल करण्याची मागणी, सेवा रस्ता खोदल्याने राँग साइडने प्रवास, मोठ्या दुर्घटनेचा धोका वाढला…

पुणे (ता. हवेली) : पुणे-सोलापूर महामार्ग कदमवाकवस्ती हद्दीमध्ये सेवा रस्त्यावर रिव्हरव्ह्यू सिटीने पाईपलाईन टाकण्यासाठी अनधिकृतपणे खड्डा खोदल्याने भीषण अपघात घडला. या खड्ड्यात दुचाकी घसरून दोन तरुण गंभीर जखमी झाले असून त्यातील एकाची प्रकृती चिंताजनक आहे. हा अपघात गुरुवारी (दि. १४ ऑगस्ट) मध्यरात्री साडेबारा वाजण्याच्या सुमारास घडला.

जखमी तरुणांची नावे वेदांत सावंत आणि आदित्य सुरेश आटोळे (दोघेही रा. पांडवदंड, कदमवाकवस्ती) अशी आहेत. आदित्य आटोळे यांना लोणी काळभोर येथील विश्वराज हॉस्पिटलमध्ये दाखल करण्यात आले असून डॉक्टरांनी त्यांची प्रकृती गंभीर असल्याचे सांगितले आहे. दोघे तरुण घरी जात असताना सेवा रस्त्यावर 15 ते 20 फूट खोल खड्ड्यात पडले. स्थानिक नागरिकांनी तत्काळ त्यांना रुग्णालयात हलवले.

नवपरिवर्तन फाउंडेशनचे अध्यक्ष चित्तरंजन गायकवाड यांनी या घटनेबाबत तीव्र संताप व्यक्त करत, “ग्रामपंचायतीने यापूर्वीच पाईपलाईनसाठी शिवरस्त्याचा वापर करण्याची सूचना दिली होती. मात्र रिव्हरव्ह्यू सिटीने शासकीय आदेश धाब्यावर बसवून सेवा रस्त्यावर बेकायदा काम केले. या ठिकाणी कोणतीही सुरक्षा उपाययोजना नव्हती. अपघातातील सर्व खर्च दोषींनी उचलावा व संबंधितांवर गुन्हा दाखल करावा, अन्यथा तीव्र आंदोलन करण्यात येईल,” असा इशारा दिला.

सेवा रस्ता खोदल्याने वाहनचालकांना राँग साइडने प्रवास करावा लागत आहे, ज्यामुळे मोठ्या दुर्घटनेचा धोका अधिक वाढला आहे.

भारतीय राष्ट्रीय महामार्ग प्राधिकरणाचे कार्यकारी अभियंता पंकज प्रसाद यांना याबाबत प्रतिक्रिया घेण्यासाठी संपर्क साधला असता फोन उचलला नाही. तत्पुर्वी इंजिनिअर रोहन जगताप यांनी स्पष्ट सांगितले की, मी प्रतिक्रिया देऊ शकत नाही.

“महामार्गाच्या मध्यापासून 15 मीटर अंतर बाहेरच काम करण्याची परवानगी असते. सेवा रस्त्यावर परवानगी नसते. अनधिकृतपणे सेवा रस्ता खोदून अपघात झाला तर दोषींवर गुन्हा दाखल होणार का? संबंधितांवर तुटपुंजी कारवाई करुन मामला रफा दफा करणार हा येणारा काळच ठरवेल.” या कारवाईकडे कदमवाकवस्ती ग्रामपंचायतीच्या नागरिकांचे लक्ष लागले आहे.

Editer sunil thorat