लोणी काळभोर पोलीसांची अवैध मटका-जुगार अड्ड्यावर धडक कारवाई ; २ लाखांहून अधिक मुद्देमाल जप्त, ७ जणांना अटक…

लोणी काळभोर (ता. हवेली) : परिसरात सुरू असलेल्या अवैध मटका व जुगार व्यवसायाविरुद्ध लोणी काळभोर पोलीसांनी मोठी धडक कारवाई करत जुगार अड्ड्यावर छापा टाकला. या कारवाईत एकूण सुमारे २ लाख १० हजार ३०० रुपयांचा मुद्देमाल जप्त करण्यात आला असून ७ जणांना अटक करण्यात आली आहे. या घटनेमुळे परिसरातील अवैध धंदे करणाऱ्यांमध्ये खळबळ उडाली आहे.

पोलीसांनी दिलेल्या माहितीनुसार, वरिष्ठ पोलीस निरीक्षक राजेंद्र पन्हाळे यांना थेकर फाटा परिसरात नयन बारजवळ अवैधरित्या ‘कल्याण मटका’ व ‘सोरट पत्ती’ जुगार सुरू असल्याची गोपनीय माहिती मिळाली होती. त्यानुसार पोलीस पथकाने नियोजनपूर्वक सापळा रचून संबंधित ठिकाणी छापा टाकला. छाप्यावेळी काही जण जुगार खेळताना तसेच जुगार चालवताना रंगेहात पकडले गेले.

या कारवाईत अटक करण्यात आलेल्या आरोपींमध्ये सुजित हरी बोडके (रा. थेकर), करण सुरेश कारे (रा. कदमवाक वस्ती), विशाल गुंडाप्पा वाघमारे (रा. माळी मळा, लोणी काळभोर), सतिष दिलीप चौडकर (रा. कुंजीरवाडी), बंटी शंकर गायकवाड (रा. तरवडे रायवाडी), मंदार सोपान हगवणे (रा. सोरतापवाडी) आणि शिवाजी बारकू चव्हाण (रा. थेऊर) यांचा समावेश आहे.

पोलीसांनी छाप्यात ९,३०० रुपये रोख रक्कम, सुमारे १० हजार रुपयांचे मोबाईल हँडसेट, तसेच अंदाजे १ लाख ९० हजार रुपयांच्या मोटारसायकली आणि जुगाराचे साहित्य असा एकूण २ लाख १० हजार ३०० रुपयांचा मुद्देमाल जप्त केला आहे.

दरम्यान, या जुगार अड्ड्याचा मुख्य सूत्रधार विकास राजूभाऊ कांबळे (रा. कारेवाडी) हा सध्या फरार असून त्याच्यासह इतर दोन अज्ञात आरोपींचा शोध पोलीस घेत आहेत. या प्रकरणी संबंधित आरोपींविरुद्ध जुगार प्रतिबंधक कायद्यानुसार गुन्हा दाखल करण्यात आला असून पुढील तपास सुरू आहे.

ही कारवाई पोलीस आयुक्तालयाच्या मार्गदर्शनाखाली करण्यात आली. यामध्ये वरिष्ठ पोलीस निरीक्षक राजेंद्र पन्हाळे, पोलीस उपनिरीक्षक योगेश पैठणे, पोलीस हवालदार संदीप जोगदंड, पोलीस अंमलदार गणेश शिंदे, प्रविण दडस, अशोक गिरी तसेच महिला पोलीस अंमलदार माधुरी खोमणे यांनी सहभाग घेतला.
पोलीस प्रशासनाने दिलेल्या माहितीनुसार, लोणी काळभोर परिसरात सुरू असलेल्या अवैध धंद्यांवर आळा घालण्यासाठी अशा प्रकारच्या कारवाया सातत्याने केल्या जाणार आहेत. “अवैध व्यवसाय करणाऱ्यांविरुद्ध कठोर कारवाई केली जाईल. नागरिकांनी अशा प्रकारच्या गैरकृत्यांची माहिती पोलीसांना द्यावी,” असे आवाहन वरिष्ठ पोलीस निरीक्षक राजेंद्र पन्हाळे यांनी केले आहे.

या कारवाईमुळे परिसरातील अवैध मटका-जुगार व्यवसायाला मोठा धक्का बसला असून स्थानिक नागरिकांनी पोलीसांच्या या कारवाईचे स्वागत केले आहे.

Editer sunil thorat