परवानगीच्या नावाखाली लाचेची मागणी, लोणी काळभोर अपर तहसील कार्यालयातील तलाठ्यावर गुन्हा
लोणीकाळभोर (ता. हवेली) : शेतजमिनीच्या विविध कामांसाठी आवश्यक असलेल्या शासकीय परवानग्या देण्यासाठी तब्बल दोन लाख रुपयांची लाच मागितल्याप्रकरणी लोणी काळभोर अपर तहसील कार्यालयातील तलाठ्यावर गुन्हा दाखल करण्यात आला आहे. लाचलुचपत प्रतिबंधक विभागाच्या (एसीबी) कारवाईमुळे महसूल विभागात मोठी खळबळ उडाली असून, सरकारी कार्यालयांमधील भ्रष्टाचाराचा मुद्दा पुन्हा एकदा ऐरणीवर आला आहे. याप्रकरणी ग्राम महसूल अधिकारी म्हणून कार्यरत असलेले अक्षय शिवाजी कोल्हे (वय २८) यांच्याविरोधात लोणी काळभोर पोलीस ठाण्यात गुन्हा नोंदविण्यात आला आहे. तक्रारदाराने लाचलुचपत प्रतिबंधक विभागाकडे धाव घेतल्यानंतर एसीबीने पडताळणी करून ही कारवाई केली.
लाचलुचपत प्रतिबंधक विभागाने दिलेल्या माहितीनुसार, तक्रारदार हे जमीन खरेदी-विक्रीचा व्यवसाय करतात. त्यांनी हवेली तालुक्यातील हिंगणगाव परिसरातील शेतजमिनीचे सपाटीकरण, विहीर खोदकाम तसेच पाईपलाईन टाकण्यासाठी आवश्यक असलेली शासकीय परवानगी मिळावी यासाठी अपर तहसीलदार कार्यालय, लोणी काळभोर येथे अर्ज दाखल केला होता. तक्रारदाराच्या म्हणण्यानुसार, संबंधित कामांना मंजुरी देण्यासाठी तलाठी अक्षय कोल्हे यांनी दोन लाख रुपयांच्या लाचेची मागणी केली. सरकारी कामासाठी एवढ्या मोठ्या रकमेची मागणी होत असल्याने तक्रारदाराने थेट लाचलुचपत प्रतिबंधक विभागाशी संपर्क साधला. त्यानंतर एसीबीने संपूर्ण प्रकरणाची गोपनीय पडताळणी केली.
या पडताळणीदरम्यान आरोपी तलाठी कोल्हे यांनी दोन लाख रुपयांची लाच मागितल्याचे निष्पन्न झाले. तसेच तडजोडीअंती एक लाख रुपये स्वीकारण्याची तयारीही त्यांनी दर्शविल्याचे एसीबीच्या चौकशीत समोर आले. या निष्कर्षानंतर लोणी काळभोर पोलीस ठाण्यात आरोपीविरोधात लाच मागणीचा गुन्हा दाखल करण्यात आला. दरम्यान, महसूल विभागातील कामांसाठी नागरिकांना वारंवार अडथळे, दिरंगाई आणि पैशांची मागणी सहन करावी लागत असल्याच्या तक्रारी कायम समोर येत असतात.
अशा कारवायांमुळे प्रशासनातील भ्रष्टाचार पुन्हा अधोरेखित झाला असून, संबंधित अधिकाऱ्यांवर कठोर कारवाईची मागणी नागरिकांतून होत आहे.
या प्रकरणाचा पुढील तपास लाचलुचपत प्रतिबंधक विभागाकडून सुरू असून, आणखी काही धक्कादायक बाबी समोर येण्याची शक्यता व्यक्त केली जात आहे.
Editer sunil thorat
