थेऊर ग्रामपंचायत फेर आरक्षण सोडतीवर मोठा वाद; १७ जुलैची नोटीस, सभा नाही… १८ जुलैची प्रक्रिया संशयाच्या भोवऱ्यात…
थेऊर, (पुणे : हवेली तालुक्यातील थेऊर ग्रामपंचायतीच्या आगामी निवडणुकीसाठी झालेल्या वॉर्ड फेरआरक्षण प्रक्रियेवरून मोठा वाद निर्माण झाला असून, संपूर्ण प्रक्रियेच्या पारदर्शकतेवर ग्रामस्थांनी गंभीर प्रश्नचिन्ह उपस्थित केले आहे. १७ जुलैच्या विशेष ग्रामसभेची नोटीस सोशल मीडियावर व्हायरल झाली; मात्र प्रत्यक्षात त्या दिवशी ग्रामसभा झालीच नसल्याचा दावा ग्रामस्थांनी केला आहे. त्यानंतर अवघ्या एका दिवसाच्या नोटिशीवर १८ जुलै रोजी फेरआरक्षण प्रक्रिया पार पडल्याने संपूर्ण कार्यवाहीवर आक्षेप घेतले जात आहेत.
माहितीनुसार, १२ जून २०२६ रोजी झालेल्या आरक्षण सोडतीनंतर वॉर्ड क्रमांक ४ च्या आरक्षणावर हरकत दाखल करण्यात आली होती. त्यानंतर प्रांताधिकारी स्तरावर सुनावणी होऊन अपर तहसीलदारांनी फेरआरक्षणाबाबतचा अहवाल जिल्हाधिकारी कार्यालयाकडे पाठविला. राज्य निवडणूक आयोगाच्या वेळापत्रकानुसार १० जुलैपर्यंत अंतिम आरक्षण जाहीर होणे अपेक्षित असतानाही थेऊर ग्रामपंचायतीची अंतिम आरक्षण यादी प्रसिद्ध झाली नव्हती.
दरम्यान, १६ जुलै रोजी सायंकाळी अपर तहसीलदार तृप्ती कोलते यांच्या स्वाक्षरीचे पत्र सोशल मीडियावर व्हायरल झाले. या पत्रानुसार १७ जुलै रोजी सकाळी ११ वाजता विशेष ग्रामसभा घेऊन फेरआरक्षण सोडत होणार असल्याचे नमूद करण्यात आले होते. ग्रामसभेच्या अध्यक्षपदी लोणी काळभोर मंडलाधिकारी लक्ष्मण बांडे यांची नियुक्ती असल्याचाही उल्लेख होता.
मात्र, मंडलाधिकारी लक्ष्मण बांडे यांनी आपल्याला या ग्रामसभेबाबत कोणताही लेखी अथवा तोंडी आदेश मिळाला नसल्याचे सांगितल्याचा दावा ग्रामस्थांनी केला आहे. त्यामुळे १७ जुलै रोजी सकाळी मोठ्या संख्येने ग्रामस्थ ग्रामपंचायत कार्यालयात जमा झाले. मात्र, ग्रामपंचायत प्रशासनाने अशा कोणत्याही ग्रामसभेची माहिती किंवा अधिकृत पत्र प्राप्त झाले नसल्याचे सांगितल्याने त्या दिवशी ग्रामसभा झालीच नाही. त्यामुळे ग्रामस्थांमध्ये मोठा संभ्रम आणि संताप निर्माण झाला.
यानंतर १७ जुलै रोजी सायंकाळी साडेसहा वाजल्यानंतर ग्रामपंचायत कार्यालयाच्या नोटीस फलकावर १८ जुलै रोजी सकाळी ११ वाजता विशेष ग्रामसभा होणार असल्याची नवीन सूचना लावण्यात आली. रात्री आठ वाजता दवंडी देण्यात आली आणि त्यानुसार १८ जुलै रोजी मंडलाधिकारी लक्ष्मण बांडे यांच्या अध्यक्षतेखाली विशेष ग्रामसभा घेऊन फेरआरक्षण प्रक्रिया पूर्ण करण्यात आली.
मात्र, या प्रक्रियेदरम्यान नागरिक आणि अधिकाऱ्यांमध्ये शाब्दिक वाद झाला. परिस्थिती तणावपूर्ण होण्याची शक्यता लक्षात घेऊन पोलिस बंदोबस्त तैनात करण्यात आला होता. अनेक ग्रामस्थांनी तात्काळ हरकती नोंदवून त्या ग्रामसभेच्या इतिवृत्तात समाविष्ट करण्याची मागणी केली. तसेच संपूर्ण फेरआरक्षण प्रक्रियेला न्यायालयीन व प्रशासकीय स्तरावर आव्हान देण्याचा इशाराही दिला.
ग्रामस्थांनी आणखी गंभीर आरोप करत, प्रत्यक्ष ग्रामसभेत आरक्षणाची सोडत काढण्यात आलीच नाही, तर वॉर्डनिहाय आरक्षणाची संपूर्ण यादी किंवा ‘स्क्रिप्ट’ आधीच तयार करून आणण्यात आली होती आणि सभागृहात केवळ तिचे वाचन करण्यात आल्याचा दावा केला. कोणतीही सविस्तर चर्चा, हरकतींवरील विचार किंवा प्रत्यक्ष सोडत न करता केवळ औपचारिकता पूर्ण करण्यात आल्याचा आरोपही त्यांनी केला आहे. यावेळी अनेक ग्रामस्थांनी उभे राहून प्रक्रियेचा निषेध नोंदविला.
ग्रामसभा घेण्याच्या कायदेशीर प्रक्रियेवरही ग्रामस्थांनी प्रश्न उपस्थित केले आहेत. नियमानुसार ग्रामसभेची सूचना किमान तीन दिवस आधी देणे आवश्यक असताना, केवळ एक दिवस आधी सायंकाळी नोटीस लावून दुसऱ्याच दिवशी ग्रामसभा घेण्यात आल्याने संपूर्ण प्रक्रिया नियमबाह्य असल्याचा आरोप करण्यात आला आहे. काही ग्रामस्थांनी, “तासाभराच्या गोंधळात नेमके काय झाले हेच समजले नाही,” अशी प्रतिक्रिया दिली.
याबाबत निवडणूक अधिकारी तथा ग्रामसभेचे अध्यक्ष लक्ष्मण बांडे यांच्याकडे प्रतिक्रिया मागितली असता, “या प्रकरणातील माझे संपूर्ण म्हणणे ग्रामसभेच्या प्रोसिडिंग रजिस्टरमध्ये नोंदविलेले आहे,” एवढीच प्रतिक्रिया देत त्यांनी माध्यमांसमोर अधिक बोलण्यास नकार दिला.
दरम्यान, या संपूर्ण प्रकरणाची विभागीय आयुक्तांकडे तक्रार करून फेरआरक्षण प्रक्रियेची चौकशी करण्याची मागणी ग्रामस्थांनी केली आहे. त्यामुळे थेऊर ग्रामपंचायतीतील फेरआरक्षणाचा वाद आणखी चिघळण्याची चिन्हे आहेत.
Editer sunil thorat
