बीजेएस महाविद्यालयातील मोडी कागदपत्र प्रदर्शनाला उत्स्फूर्त प्रतिसाद ; १,३०० हून अधिक विद्यार्थी-नागरिकांनी घेतला इतिहासाचा वेध…
वाघोली, ता. हवेली : सांस्कृतिक कार्य विभाग, पुराभिलेख संचालनालय, मुंबई (महाराष्ट्र शासन) आणि भारतीय जैन संघटनेच्या (बीजेएस) कला, विज्ञान व वाणिज्य महाविद्यालयाच्या इतिहास विभागाच्या संयुक्त विद्यमाने आयोजित दोन दिवसीय मोडी कागदपत्र प्रदर्शनाला विद्यार्थी, शिक्षक आणि नागरिकांचा उत्स्फूर्त प्रतिसाद मिळाला. प्रदर्शनाला विविध शाळा व महाविद्यालयांतील सुमारे १,३०० हून अधिक विद्यार्थी, शिक्षक आणि ग्रामस्थांनी भेट देत मोडी लिपीतील ऐतिहासिक वारशाचा जवळून परिचय करून घेतला.
प्रदर्शनाचे उद्घाटन महाराष्ट्र राज्य पुराभिलेख संचालनालयाचे संचालक सुजितकुमार उगले यांच्या हस्ते झाले. यावेळी बोलताना त्यांनी, “मोडी लिपी ही भारतीय ज्ञान परंपरेतील अत्यंत महत्त्वाची लिपी असून तिच्यातील दुर्मिळ ऐतिहासिक कागदपत्रांमुळे मध्ययुगीन भारताचा सामाजिक, आर्थिक आणि राजकीय इतिहास समजण्यास मोठी मदत होते,” असे सांगितले. तसेच महाराष्ट्रात सुमारे साडे सतरा कोटी ऐतिहासिक कागदपत्रे जतन करण्यात आली असून ती पुणे, मुंबई, कोल्हापूर, छत्रपती संभाजीनगर आणि नागपूर येथील विभागीय पुराभिलेख कार्यालयांत सुरक्षित ठेवण्यात आल्याची माहिती त्यांनी दिली.
कार्यक्रमास बीजेएस प्रबंध समिती सदस्य सुरेश साळुंके, सीईओ डॉ. रविंद्रसिंह परदेशी, प्राचार्या डॉ. मनिषा बोरा, प्राचार्य संतोष भंडारी, सहाय्यक संचालक गणेश खोडके, महेश पाटील, शैला जंगम, ॲड. सतीश हरगुडे आदी मान्यवर उपस्थित होते.
प्रदर्शनामध्ये आज्ञापत्र, वतनपत्र, सनदपत्र, करारनामापत्र, वर्षासनपत्र, इनामपत्र, दानपत्र, सरंजामपत्र, अभयपत्र, ताकीदपत्र, दस्तकपत्र, राजीनामापत्र, मिरासी वतनपत्र, विनंतीपत्र, हकीकतपत्र, बातमीपत्र, जामीनकतबा, जबाबपत्र, तहनामापत्र, निकालपत्र, निवाडापत्र, कौलनामापत्र, क्रयपत्र, आभारपत्र आदी विविध प्रकारच्या दुर्मिळ मोडी कागदपत्रांचे प्रदर्शन करण्यात आले होते.
या प्रदर्शनाला बीजेएस माध्यमिक व उच्च माध्यमिक विद्यालय, बीजेएस वसतिगृह, माध्यमिक आश्रमशाळा (वाघोली), छत्रपती संभाजी हायस्कूल व ज्युनिअर कॉलेज (कोरेगाव भीमा), विष्णूजी शेकोजी सातव विद्यालय, हरी उद्धव धोत्रे माध्यमिक विद्यालय (फुलगाव), बीजेएस महाविद्यालय, टिकाराम जगन्नाथ कला, वाणिज्य व विज्ञान महाविद्यालय (खडकी), कै. तुकाराम धोंडीबा पठारे महाविद्यालय (चंदननगर), वाडिया कॉलेज आणि मॉडर्न कॉलेज, पुणे येथील विद्यार्थी व शिक्षकांनी मोठ्या संख्येने भेट दिली. शिक्षक विजय फापळे, शुभांगी गायकवाड, रामदास औटी, विक्रम बस्तापुरे, तानाजी हंडाळ, नारायण खुळे, डॉ. प्रकाश पांढरमिसे, प्रा. अश्विनी गायकवाड आणि गणेश सातव यांनीही प्रदर्शनाचा लाभ घेतला.
कार्यक्रमाचे प्रास्ताविक डॉ. मनिषा बोरा यांनी केले. सूत्रसंचालन डॉ. सहदेव चव्हाण यांनी, तर आभार प्रदर्शन डॉ. सचिन कांबळे यांनी केले. प्रदर्शनाच्या यशस्वी आयोजनासाठी प्रा. बंडू ब्राम्हणे, प्रा. निखील आगळे, डॉ. रुपाली सोनवणे, श्याम पाटील, गिरीष शहा तसेच सर्व शिक्षक व शिक्षकेतर कर्मचाऱ्यांनी विशेष परिश्रम घेतले.
Editer sunil thorat
