सलग 5 मेडन ओव्हर, 5 विकेट; जस्टिन ग्रीव्सच्या घातक स्पेलने टेस्ट क्रिकेटमध्ये इतिहास, पाकिस्तानचा डाव कोसळला…
WI vs PAK Test : वेस्ट इंडिजचा वेगवान गोलंदाज जस्टिन ग्रीव्स याने पाकिस्तानविरुद्धच्या कसोटी सामन्यात इतिहास घडवत अविश्वसनीय गोलंदाजी केली. सलग पाच मेडन षटके टाकत प्रत्येक षटकात एक विकेट घेण्याचा पराक्रम करत त्याने पाकिस्तानच्या फलंदाजीची अक्षरशः दाणादाण उडवली. त्याच्या या घातक स्पेलमुळे सामन्याचे चित्र पूर्णपणे बदलले.
सुरुवातीला ग्रीव्सचे गोलंदाजीतील आकडे 6 षटके, 27 धावा, एकही विकेट नाही असे होते. मात्र त्यानंतर त्याने जबरदस्त पुनरागमन करत आपल्या सातव्या षटकाच्या अखेरच्या चेंडूवर पहिली विकेट घेतली. त्यानंतर आठव्या, नवव्या, दहाव्या आणि अकराव्या षटकात प्रत्येकी एक विकेट घेत त्याने सलग पाच षटकांत एकही धाव न देता पाच विकेट्स मिळवल्या.
त्याचा अंतिम स्पेल 11 षटके, 6 मेडन, 27 धावा आणि 5 विकेट्स असा राहिला. कसोटी क्रिकेटच्या इतिहासातील हा सर्वात संस्मरणीय स्पेलपैकी एक मानला जात आहे.
https://x.com/i/status/2081801167554711819
शान मसूदचे शतक व्यर्थ
पाकिस्तानकडून कर्णधार शान मसुद याने 109 धावांची शतकी खेळी केली, तर इमाम-उल-हक याने 63 धावांचे अर्धशतक झळकावले. मात्र या दोघांव्यतिरिक्त इतर फलंदाज ग्रीव्सच्या वेगवान माऱ्यासमोर टिकू शकले नाहीत.
ग्रीव्सने शान मसूदला बोल्ड केल्यानंतर मोहम्मद रिझवान (12), आमिर जमाल (3), अली उस्मान (0) आणि मोहम्मद अब्बास (0) यांना बाद करत आपल्या पाच विकेट्स पूर्ण केल्या. बाबर आझमने 23, सलमान आगा 20 आणि खुर्रम शहजादने 19 धावा केल्या. पाकिस्तानचा संपूर्ण डाव 80.1 षटकांत 282 धावांवर आटोपला.
ग्रीव्सव्यतिरिक्त केमार रोच आणि शेमार जोसेफ यांनी प्रत्येकी दोन, तर जेडेन सिल्स याने एक विकेट घेतली.
वेस्ट इंडिजला 29 धावांची आघाडी
याआधी वेस्ट इंडिजचा कर्णधार रोस्टन चेस याने नाणेफेक जिंकून प्रथम फलंदाजीचा निर्णय घेतला होता. वेस्ट इंडिजने पहिल्या डावात 311 धावा उभारल्या. शाय होप (92) आणि केव्हेम हॉज (84) यांच्या दमदार खेळीमुळे संघाने भक्कम धावसंख्या उभारली.
यानंतर पाकिस्तानला 282 धावांत गुंडाळत वेस्ट इंडिजने 29 धावांची महत्त्वाची आघाडी मिळवली. मात्र या डावातील सर्वाधिक चर्चेचा विषय ठरला तो जस्टिन ग्रीव्सचा सलग पाच मेडन षटकांत पाच विकेट्स घेण्याचा ऐतिहासिक स्पेल.
Editer sunil thorat
