हुशारी दाखवली, तरीही PSI अडकला! ५० हजारांच्या लाचेची मागणी भोवली ; एसीबीकडून गुन्हा दाखल…
छत्रपती संभाजीनगर : रक्षकच भक्षक बनल्याचा धक्कादायक प्रकार छत्रपती संभाजीनगरमध्ये समोर आला आहे. शहर पोलीस आयुक्तालयातील आर्थिक गुन्हे शाखेत कार्यरत असलेल्या एका पोलीस उपनिरीक्षकाविरोधात ६० वर्षीय व्यक्तीकडे ५० हजार रुपयांची लाच मागितल्याप्रकरणी लाचलुचपत प्रतिबंधक विभागाने (एसीबी) गुन्हा दाखल केला आहे. या कारवाईमुळे पोलीस दलात एकच खळबळ उडाली आहे.
गुन्हा दाखल झालेल्या पोलीस उपनिरीक्षकाचे नाव चंद्रकांत कामठे (वय ३८, रा. सातारा परिसर) असे आहे.
मिळालेल्या माहितीनुसार, ६० वर्षीय तक्रारदाराने फसवणुकीबाबत दिलेल्या अर्जावरून गुन्हा दाखल करण्यात आला होता. हा गुन्हा दाखल केल्याचे “बक्षीस” तसेच प्रकरणातील आरोपींना अटक करून मदत करण्याच्या मोबदल्यात पीएसआय कामठे यांनी स्वतःसाठी आणि तत्कालीन पोलीस निरीक्षक पवार यांच्यासाठी एकूण ५० हजार रुपयांच्या लाचेची मागणी २७ फेब्रुवारी २०२६ रोजी केली होती.
मात्र, लाच देण्याची इच्छा नसलेल्या तक्रारदाराने थेट एसीबी कार्यालय गाठत तक्रार दाखल केली. त्यानंतर ११ मार्च २०२६ रोजी एसीबीच्या पथकाने पंचांसमक्ष पडताळणी केली. या पडताळणीत पीएसआय कामठे यांनी ५० हजार रुपयांच्या लाचेची मागणी केल्याचे आणि तडजोडीनंतर ती स्वीकारण्यास तयारी दर्शवल्याचे निष्पन्न झाले.
दुसऱ्या दिवशी, १२ मार्च रोजीही तक्रारदाराला आरोपींकडे पाठविण्यात आले. मात्र, त्या दिवशी पोलीस निरीक्षक पवार यांची भेट झाली नाही.
संशय आल्याने टाळाटाळ, तरीही गुन्हा दाखल…
एसीबीची कारवाई सुरू असल्याचा संशय आल्याने पीएसआय कामठे यांनी तक्रारदाराला भेटणे टाळण्यास सुरुवात केली. दरम्यान, पोलीस निरीक्षक पवार यांचीही बदली झाल्याने लाचेची रक्कम स्वीकारली जाणार नसल्याचे तक्रारदाराने सांगितले. मात्र, पंचांसमक्ष लाचेची मागणी झाल्याचे स्पष्ट झाल्याने एसीबीने पीएसआय चंद्रकांत कामठे यांच्याविरोधात गुन्हा दाखल केला.
ही कारवाई एसीबीच्या पोलीस अधीक्षक माधुरी केदार कांगणे, अप्पर पोलीस अधीक्षक शशिकांत सिंगारे, पोलीस उपअधीक्षक प्रशांत पवार यांच्या मार्गदर्शनाखाली पोलीस निरीक्षक शांतीलाल चव्हाण, तपास अधिकारी चैनसिंग गुसिंगे आणि हवालदार रवींद्र काळे यांच्या पथकाने केली.
या प्रकरणामुळे भ्रष्टाचाराविरोधातील एसीबीची कारवाई पुन्हा एकदा चर्चेत आली असून, पोलीस दलातील भ्रष्ट प्रवृत्तींवर कठोर कारवाईचा इशारा मानला जात आहे.
Editer sunil thorat
