पिंपरीत धक्कादायक प्रकार! जनगणना ड्युटीवरून आलेल्या शिक्षिकेसोबत महापालिका कार्यालयात गैरवर्तन…
पिंपरी, दि. १९ : शासकीय जनगणनेचे काम पूर्ण करून परतणाऱ्या एका शिक्षिकेसोबत महापालिकेच्या कार्यालयातच गैरवर्तन झाल्याची धक्कादायक घटना उघडकीस आली आहे. पिंपरी-चिंचवड महापालिकेच्या ‘एफ’ प्रभाग कार्यालयात हा प्रकार घडल्याने महापालिका वर्तुळात खळबळ उडाली असून महिला सुरक्षेचा प्रश्न पुन्हा ऐरणीवर आला आहे.
या प्रकरणी महापालिकेच्या नगर नियोजन विभागातील एका कर्मचाऱ्याविरुद्ध निगडी पोलिस ठाण्यात गुन्हा दाखल करण्यात आला आहे. दिलीप आडे (वय ४५) असे गुन्हा दाखल झालेल्या कर्मचाऱ्याचे नाव असल्याची माहिती पोलिसांनी दिली.
पोलिसांच्या माहितीनुसार, एका खासगी शैक्षणिक संस्थेत कार्यरत असलेल्या ४७ वर्षीय शिक्षिका सध्या शासकीय जनगणना कार्यासाठी नियुक्त आहेत. जनगणनेचे काम पूर्ण करून त्या महापालिकेच्या ‘एफ’ प्रभाग कार्यालयात आल्या असताना संबंधित कर्मचाऱ्याने त्यांच्याशी गैरवर्तन केल्याचा आरोप करण्यात आला आहे. यानंतर शिक्षिकेने निगडी पोलिस ठाण्यात तक्रार दाखल केली.
तक्रारीच्या आधारे पोलिसांनी संबंधित कर्मचाऱ्याविरुद्ध गुन्हा नोंदवून पुढील तपास सुरू केला आहे. सरकारी कामकाजासाठी आलेल्या महिला कर्मचाऱ्यांशी कार्यालयीन परिसरातच गैरवर्तन झाल्याच्या या घटनेमुळे संताप व्यक्त केला जात असून दोषींवर कठोर कारवाईची मागणी होत आहे.
दरम्यान, या घटनेनंतर महापालिका कार्यालयांमधील महिला सुरक्षेच्या उपाययोजनांबाबत प्रश्न उपस्थित होत आहेत. पोलिसांकडून प्रकरणाचा सखोल तपास सुरू असून संबंधितांच्या जबाबांची नोंद घेण्यात येत आहे.
महिला सुरक्षेचा प्रश्न पुन्हा ऐरणीवर
महापालिका कार्यालयासारख्या सार्वजनिक आणि शासकीय ठिकाणी महिला कर्मचाऱ्यांसोबत गैरवर्तनाची घटना घडल्याने महिला सुरक्षेबाबत चिंता व्यक्त केली जात आहे. दोषींवर कठोर कारवाई करून अशा घटनांना आळा घालण्याची मागणी विविध स्तरांतून होत आहे.
Editer sunil thorat
