मांजरी बुद्रुक (हडपसर), दि. २९ : मांजरी बुद्रुक (ता. हवेली, जि. पुणे) येथील सर्व्हे क्र. ३६/१ब/२ मधील कथित अनधिकृत उत्खनन आणि त्यातून काढण्यात आलेल्या मोठ्या प्रमाणातील मुरूम व मातीच्या साठवणुकीचे प्रकरण सध्या चर्चेचा विषय ठरले आहे. बांधकामासाठी करण्यात आलेल्या उत्खननातून निघालेला मुरूम व माती आवश्यक शासकीय परवानगीशिवाय शेजारील जागेत साठवण्यात आल्याची माहिती महसूल विभागाच्या निदर्शनास आल्याचे सूत्रांकडून समजते.
सूत्रांच्या माहितीनुसार, २७ जून २०२६ रोजी ग्राम महसूल अधिकारी सुवर्णा लोहकरे यांनी कोतवाल व पंचांच्या उपस्थितीत संबंधित ठिकाणी प्रत्यक्ष पाहणी करून साठवलेल्या मुरूम व मातीचा फोटोसह पंचनामा केला. प्राथमिक पाहणीत संबंधित ठिकाणी अंदाजे १२० ते १३० ब्रास मुरूम व मातीचा साठा असल्याचे आढळल्याची चर्चा आहे.
एवढ्या मोठ्या प्रमाणात गौण खनिजाचा साठा करूनही त्यासाठी आवश्यक महसूल विभाग अथवा सक्षम प्राधिकरणाची परवानगी घेतल्याचे कोणतेही दस्तऐवज उपलब्ध नसल्याचेही बोलले जात आहे. त्यामुळे महाराष्ट्र जमीन महसूल संहिता व गौण खनिज नियमांनुसार संबंधितांवर कारवाई होणार का, याकडे स्थानिक नागरिकांचे लक्ष लागले आहे.
या संदर्भात थेऊर मंडल अधिकारी किशोर जाधव यांच्याशी संपर्क साधला असता त्यांनी सांगितले की, “तलाठी सुवर्णा लोहकरे यांनी पंचनामा केला असून पुढील कारवाईसाठी अहवाल अप्पर तहसीलदार तृप्ती कोलते यांच्याकडे पाठविण्यात आला आहे. सातबारा उताऱ्यावर नाव असलेल्या संबंधितांना नियमानुसार नोटिसा बजावण्यात येतील.”
दरम्यान, महसूल विभागाकडून या प्रकरणाबाबत अधिकृत अंतिम खुलासा अद्याप झालेला नाही. तसेच संबंधित जमीनधारक किंवा बांधकाम व्यावसायिकांची बाजूही अद्याप समोर आलेली नसल्याने तपासातून नेमके काय निष्पन्न होते आणि प्रशासन पुढे कोणती कारवाई करते, याकडे मांजरी बुद्रुक परिसरातील नागरिकांचे लक्ष लागले आहे.
याच दरम्यान या घटनेची छायाचित्रण करण्यासाठी आलेल्या पत्रकार यांनी माती मिश्रीत वाळू असल्याचे सांगितले. जर माती होती तर ती रातोरात कशी उचलण्यात आली. अशा संशयीत घटनेने संबंधित प्रकरण कोणते वळण घेते हे पाहणे औत्युक्याचे ठरणार आहे.
टीप : या वृत्तातील काही माहिती सूत्रांकडून व स्थानिक चर्चेवर आधारित आहे. महसूल विभागाचा अधिकृत अहवाल किंवा संबंधित पक्षाची भूमिका प्राप्त झाल्यानंतर तीही प्रसिद्ध करण्यात येईल.
Editer sunil thorat
