24 तास रुग्णालयात दाखल राहण्याची सक्ती शिथिल; काही मेडिक्लेम पॉलिसींमध्ये 2 तासांच्या उपचारांनाही कॅशलेस सुविधा…
नवी दिल्ली : आरोग्य विमाधारकांसाठी दिलासादायक ठरणारा महत्त्वाचा बदल करण्यात आला आहे. आधुनिक वैद्यकीय उपचारपद्धतींमुळे अनेक शस्त्रक्रिया आणि उपचार काही तासांत पूर्ण होऊ लागल्याने काही आरोग्य विमा कंपन्यांनी 24 तास रुग्णालयात दाखल राहण्याची अनिवार्य अट शिथिल केली आहे. त्यामुळे पात्र पॉलिसीधारकांना केवळ दोन तास रुग्णालयात दाखल राहूनही कॅशलेस मेडिक्लेमचा लाभ मिळू शकतो.
यापूर्वी बहुतांश मेडिक्लेम पॉलिसींमध्ये किमान 24 तास रुग्णालयात दाखल राहणे आवश्यक होते. मात्र मोतीबिंदू शस्त्रक्रिया, केमोथेरपी, अँजिओग्राफी, डायलिसिस, लेझर उपचार तसेच काही लहान शस्त्रक्रिया काही तासांत पूर्ण होत असल्याने या नियमात बदल करण्यात आला आहे. विमा नियामक IRDAI च्या मार्गदर्शक तत्त्वांनुसार विमा कंपन्यांनी आधुनिक उपचारपद्धती लक्षात घेऊन पॉलिसींमध्ये आवश्यक बदल करण्यास सुरुवात केली आहे. तथापि, हा नियम सर्व आरोग्य विमा पॉलिसींना लागू होत नाही. काही निवडक पॉलिसींमध्येच दोन तासांच्या हॉस्पिटलायझेशननंतर कॅशलेस क्लेमची सुविधा उपलब्ध आहे. त्यामुळे संबंधित विमा कंपनीच्या पॉलिसीचे नियम तपासणे आवश्यक आहे.
या सुविधेचा लाभ घेण्यासाठी रुग्णाला डॉक्टरांच्या सल्ल्यानुसार रुग्णालयात दाखल होणे, उपचारांची नोंद, डिस्चार्ज समरी आणि आवश्यक कागदपत्रे सादर करणे गरजेचे आहे. तसेच नेटवर्क हॉस्पिटलमध्ये प्री-अथॉरायझेशन घेतल्यास कॅशलेस क्लेम प्रक्रिया अधिक सुलभ होते. ओपीडी उपचार, कॉस्मेटिक प्रक्रिया किंवा वैद्यकीय गरज नसताना दाखल झालेल्या रुग्णांना या सुविधेचा लाभ मिळणार नाही.
IRDAI च्या मार्गदर्शक तत्त्वांनुसार आवश्यक कागदपत्रे पूर्ण असल्यास कॅशलेस क्लेम 30 मिनिटांपासून 2 तासांच्या आत मंजूर होऊ शकतो. त्यामुळे कमी कालावधीच्या उपचारांसाठीही विमाधारकांना आर्थिक दिलासा मिळण्याचा मार्ग मोकळा झाला आहे.
तज्ज्ञांच्या मते, आपल्या आरोग्य विमा पॉलिसीतील अटी-शर्ती वेळोवेळी तपासून घेणे, आवश्यक कागदपत्रे अद्ययावत ठेवणे आणि उपचारापूर्वी विमा कंपनीकडून प्री-अथॉरायझेशन घेणे अत्यंत महत्त्वाचे आहे.
Editer sunil thorat
