पालखी सोहळ्यासाठी पुणे महापालिकेची जय्यत तयारी; वारकऱ्यांसाठी ६ ‘जर्मन हँगर’ शेड्स, २ हजार शौचालये, ४२ रुग्णवाहिका आणि ‘सेवा वारी’ उपक्रम…
पुणे : संत ज्ञानेश्वर महाराज आणि संत तुकाराम महाराज यांच्या आषाढी पालखी सोहळ्याच्या पार्श्वभूमीवर पुणे महानगरपालिकेने वारकऱ्यांच्या सोयीसुविधांसाठी व्यापक नियोजन केले आहे. यंदा प्रथमच पालखी मुक्कामाच्या ठिकाणी पावसापासून संरक्षणासाठी ६ अत्याधुनिक ‘जर्मन हँगर’ शेड्स उभारण्यात येणार असून, त्यासोबत १९५ मंडपांची व्यवस्था करण्यात येणार आहे. ही माहिती महापौर मंजुषा नागपुरे यांनी पत्रकार परिषदेत दिली.
महापालिकेत महापौरांच्या अध्यक्षतेखाली विविध विभागांच्या अधिकाऱ्यांची आढावा बैठक पार पडली. त्यानंतर पालखी सोहळ्यासाठी करण्यात आलेल्या नियोजनाची माहिती देताना त्यांनी सांगितले की, लाखो वारकऱ्यांची सेवा ही ईश्वरसेवेइतकीच पवित्र मानून यंदा ‘सेवा वारी’ हा विशेष उपक्रम राबविण्यात येणार आहे.
‘सेवा वारी’ उपक्रमातून जनसहभागाला प्राधान्य…
‘माझे शहर, माझी जबाबदारी’ या संकल्पनेवर आधारित ‘सेवा वारी’ उपक्रमातून पालखी सोहळ्याचे दस्तावेजीकरण, स्वच्छता, जनजागृती आणि स्वयंसेवा यावर भर दिला जाणार आहे. शहरातील विविध सामाजिक संस्था, स्वयंसेवी संघटना, महाविद्यालयीन विद्यार्थी तसेच नागरिकांनी या उपक्रमात सहभागी होऊन वारकऱ्यांची सेवा करावी, असे आवाहन महापौर नागपुरे यांनी केले.
याच उपक्रमांतर्गत छायाचित्र स्पर्धा तसेच ० ते १६ वर्षे वयोगटातील मुलांसाठी वेशभूषा स्पर्धा आयोजित करण्यात येणार आहे. तसेच पालखी मार्ग आणि मुक्कामस्थळ परिसर स्वच्छ ठेवण्यासाठी विशेष मोहीम राबविण्यात येणार आहे.
डीजे आणि मोठ्या स्पीकर्सना नकार…
पालखीच्या स्वागतावेळी डीजे किंवा मोठ्या आवाजातील स्पीकर्सचा वापर टाळावा, असे आवाहनही महापौरांनी केले. मोठ्या आवाजामुळे दिंडीतील वारकऱ्यांना त्रास होतो. त्यामुळे पारंपरिक आणि भक्तिमय वातावरण कायम राखण्यासाठी नागरिकांनी सहकार्य करावे, असे त्यांनी स्पष्ट केले.
वारकऱ्यांसाठी सर्वसमावेशक सुविधा…
महापालिकेने पालखी सोहळ्यासाठी आरोग्य, निवास, स्वच्छता आणि आपत्कालीन सेवांवर विशेष भर दिला आहे. वारकऱ्यांच्या मुक्कामासाठी शाळांची व्यवस्था, फिरती शौचालये, मंडप, आरोग्य सुविधा आणि वैद्यकीय मदत उपलब्ध करून देण्यात येणार आहे.
पालखी सोहळ्यासाठी महापालिकेच्या प्रमुख सुविधा…
२ हजार शौचालयांची व्यवस्था
६ जर्मन हँगर शेड्स
१९५ मंडप
१८० फिजिओथेरपिस्ट
४०० मेडिकल किट्स
२० महापालिकेच्या रुग्णवाहिका
२२ खासगी रुग्णवाहिका
४० आरोग्य पथके
१०० वैद्यकीय विद्यार्थी
४० वैद्यकीय कक्ष
जागोजागी ‘हिरकणी’ कक्षांची उभारणी
१० जुलैला सामूहिक ‘पसायदान’ने सांगता…
‘सेवा वारी’ उपक्रमाची सांगता १० जुलै रोजी रात्री ९ वाजता सामूहिक ‘पसायदान’ कार्यक्रमाने होणार आहे. विश्वशांती आणि विश्वकल्याणासाठी पुणेकरांनी प्रत्यक्ष किंवा ऑनलाइन माध्यमातून सहभागी व्हावे, असे आवाहन महापालिकेने केले आहे.
यंदाच्या पालखी सोहळ्यात लाखो वारकरी पुण्यात दाखल होणार असल्याने त्यांच्या सुरक्षित, सुसज्ज आणि सुखकर मुक्कामासाठी पुणे महानगरपालिकेने सर्व यंत्रणा सज्ज ठेवली असून, प्रशासन आणि नागरिकांच्या सहभागातून यंदाची ‘सेवा वारी’ अधिक प्रभावी करण्याचा निर्धार व्यक्त करण्यात आला आहे.
Editer sunil thorat
