पुणे, शेवाळेवाडी : युथ आयकॉन अमित अण्णा पवार यांच्या वाढदिवसानिमित्त आयोजित करण्यात आलेल्या शेवाळेवाडी–मांजरी सोसायटी प्रीमियर लीग २०२६ या भव्य बॉक्स क्रिकेट स्पर्धेला खेळाडू, क्रीडाप्रेमी आणि नागरिकांचा उत्स्फूर्त प्रतिसाद मिळाला. दि. ३ ते ५ जुलै २०२६ या कालावधीत शेवाळेवाडी येथील अस्पायर स्पोर्ट्स क्लब येथे पार पडलेल्या या स्पर्धेत तब्बल ४८ संघांनी सहभाग नोंदवत मैदानावर चुरशीच्या लढती रंगवल्या. तीन दिवस चाललेल्या या स्पर्धेमुळे शेवाळेवाडी परिसरात क्रीडामय आणि उत्साहपूर्ण वातावरण निर्माण झाले होते.
स्पर्धेच्या उद्घाटन सोहळ्याला मांजरी पोलीस स्टेशनचे वरिष्ठ पोलीस निरीक्षक बाबासाहेब निकम यांनी प्रमुख उपस्थिती लावून खेळाडूंना शुभेच्छा दिल्या. यावेळी नगरसेवक गणेश कामठे, विक्रम दादा शेवाळे, अशोक तात्या शेवाळे, राहुल शेवाळे, निलेश पवार, संदीप दादा शेवाळे, भुजंग शेवाळे, बाळासाहेब भंडारी, छायाताई गदादे, सीमाताई शेंडे, निशाताई थोरात यांच्यासह अनेक मान्यवर उपस्थित होते. सर्वांनी खेळाडूंना प्रोत्साहन देत आयोजकांच्या नियोजनाचे कौतुक केले.
स्पर्धेतील प्रत्येक सामना प्रेक्षकांसाठी रोमांचकारी ठरला. विशेष म्हणजे डान्सिंग अंपायर एस. पी. गोविंदा यांच्या अनोख्या अंपायरिंग शैलीने संपूर्ण स्पर्धेत वेगळीच रंगत आणली. त्यांच्या हटके शैलीमुळे प्रत्येक चौकार, षटकार आणि विकेटनंतर प्रेक्षकांचा उत्साह द्विगुणित झाला. त्यामुळे ही स्पर्धा केवळ क्रिकेटपुरती मर्यादित न राहता मनोरंजनाचाही मोठा उत्सव ठरली.
यंदा स्पर्धेचे दुसरे वर्ष असून मागील वर्षाप्रमाणेच यंदाही खेळाडूंनी उच्च दर्जाच्या खेळाचे प्रदर्शन केले. अत्यंत चुरशीच्या अंतिम सामन्यात श्रीरामनगर वॉरियर्स संघाने दमदार खेळ करत विजेतेपदावर नाव कोरले, तर टीम स्ट्रायकर्स (शिवचैतन्य कॉलनी) संघाने उपविजेतेपद पटकावले.
विजेत्या श्रीरामनगर वॉरियर्स संघाचे नेतृत्व गणेश ईवरे यांनी केले. संघात पायल ईवरे, ओंकार बारवकर, प्रज्वल हिरवे, ऋषिकेश सुपेकर, रंजीत वीर, ऋतिक सुतार आणि उत्कर्ष इनामदार या खेळाडूंनी उत्कृष्ट सांघिक खेळाचे प्रदर्शन करत विजेतेपद मिळविण्यात मोलाचा वाटा उचलला.
उपविजेत्या टीम स्ट्रायकर्स (शिवचैतन्य कॉलनी) संघाचे नेतृत्व वेदांत कामठे यांनी केले. त्यांच्या संघातील अंजली कामठे, रोहन जाधव, भुवन जाधव, तनमय बारकुंड, स्वरूप गाढवे आणि गणेश राऊत यांनी उत्कृष्ट कामगिरी करत अंतिम फेरीपर्यंत दमदार मजल मारली.
स्पर्धेदरम्यान पुणे जिल्हा शिवसेना महिला आघाडी अध्यक्षा ममता शिवतारे यांनी सदिच्छा भेट देऊन स्पर्धेच्या आयोजनाची पाहणी केली. त्यांनी शिस्तबद्ध नियोजन, खेळाडूंचा उत्साह आणि युवकांचा मोठा सहभाग याबद्दल आयोजकांचे कौतुक केले. अमित अण्णा पवार यांनी युवकांना एकत्र आणून समाजोपयोगी आणि क्रीडाप्रेम वाढविणारे उपक्रम सातत्याने राबवावेत, अशी अपेक्षाही त्यांनी व्यक्त केली.
यावेळी आमदार विजय (बापू) शिवतारे यांनी दूरध्वनीद्वारे आयोजक आणि खेळाडूंशी संवाद साधून शुभेच्छा दिल्या. अशा स्पर्धांमुळे युवकांमध्ये खेळाची आवड, संघभावना, शिस्त आणि सामाजिक ऐक्य वृद्धिंगत होत असल्याचे सांगत भविष्यात अशा उपक्रमांना अधिक व्यापक स्वरूप देण्याचे आवाहन त्यांनी केले.
स्पर्धेतील उत्कृष्ट कामगिरी करणाऱ्या खेळाडूंना विविध वैयक्तिक आणि सांघिक पुरस्कारांनी गौरविण्यात आले. प्रत्येक सामन्यासाठी ‘मॅन ऑफ द मॅच’ पुरस्कार देण्यात आला. पायल ईवरे हिने संपूर्ण स्पर्धेतील शानदार कामगिरीमुळे ‘वुमन ऑफ द सिरीज‘ हा किताब पटकावला, तर रोहन जाधव याने उत्कृष्ट अष्टपैलू कामगिरीच्या जोरावर ‘मालिकावीर‘ हा बहुमान मिळवला. विजेत्या व उपविजेत्या संघांसह सर्व उत्कृष्ट खेळाडूंना मान्यवरांच्या हस्ते चषक, सन्मानचिन्हे आणि पुरस्कार प्रदान करण्यात आले.
स्पर्धेचे आयोजक अमित अण्णा पवार यांनी सांगितले की, “तरुणांमध्ये खेळाची आवड, संघभावना, बंधुभाव आणि परस्पर प्रेमाची भावना अधिक दृढ व्हावी, तसेच निरोगी स्पर्धात्मक वातावरण निर्माण व्हावे, या उद्देशाने या स्पर्धेचे आयोजन करण्यात आले. खेळाडू, प्रेक्षक, मान्यवर आणि सर्व सहकाऱ्यांच्या उत्स्फूर्त सहभागामुळे स्पर्धा यशस्वी झाली. भविष्यात आणखी मोठ्या प्रमाणावर आणि अधिक आकर्षक स्वरूपात ही स्पर्धा आयोजित करण्याचा आमचा मानस आहे.”
शेवाळेवाडी–मांजरी परिसरातील युवकांना एकत्र आणत क्रीडा संस्कृतीला चालना देणारी ही स्पर्धा यंदाही यशस्वी ठरली असून, खेळाच्या माध्यमातून सामाजिक ऐक्य, मैत्री आणि निरोगी स्पर्धेचा संदेश देण्यात आयोजकांना मोठे यश मिळाल्याची भावना उपस्थितांनी व्यक्त केली.
Editer sunil thorat
