हवालदार भरत सकट यांच्या पुढाकाराने माजी सैनिकांचा भव्य मेळावा; १७ महार रेजिमेंटचा स्थापना दिवस उत्साहात साजरा
'सेव्हन्टीन योद्धा ग्रुप'तर्फे १७ महार रेजिमेंटचा ४८ वा स्थापना दिवस पुण्यात उत्साहात साजरा...
पुणे : भारतीय लष्कराच्या शौर्य, शिस्त आणि त्यागाची गौरवशाली परंपरा जपणाऱ्या १७ महार रेजिमेंटच्या ४८ व्या स्थापना दिनानिमित्त पुण्यातील घोरपडी येथील सैनिक महा लॉन्स येथे ३० जून व १ जुलै २०२६ रोजी दोन दिवसीय भव्य सोहळ्याचे आयोजन करण्यात आले. ‘सेव्हन्टीन योद्धा‘ माजी सैनिक संघ, महाराष्ट्र राज्य आणि उत्सव समिती २०२६ यांच्या संयुक्त विद्यमाने आयोजित या कार्यक्रमात राज्यभरातील माजी सैनिक, वीरनारी, सैनिकांचे कुटुंबीय आणि विविध क्षेत्रातील मान्यवर मोठ्या संख्येने सहभागी झाले होते.
या सोहळ्याचा मुख्य उद्देश म्हणजे १७ महार बटालियनमध्ये सेवा बजावताना एकत्र घालवलेल्या आठवणींना उजाळा देणे, निवृत्तीनंतर विखुरलेल्या सहकाऱ्यांना पुन्हा एकत्र आणणे, एकमेकांच्या सुख-दुःखात सहभागी होणे, तसेच पुढील पिढीला महार रेजिमेंटचा गौरवशाली इतिहास आणि राष्ट्रसेवेची प्रेरणा देणे हा होता. याचबरोबर रेजिमेंटप्रती कृतज्ञता व्यक्त करण्याचाही या कार्यक्रमामागील महत्त्वाचा हेतू होता.
महार रेजिमेंटचा अभिमानास्पद इतिहास…
विश्वरत्न डॉ. बाबासाहेब आंबेडकर यांच्या अथक प्रयत्नांमुळे १ ऑक्टोबर १९४१ रोजी महार रेजिमेंटची स्थापना झाली. स्वातंत्र्यानंतरच्या १९४७ च्या काश्मीर युद्धापासून १९६२ च्या चीन-भारत युद्धापर्यंत तसेच १९६५ आणि १९७१ च्या भारत-पाकिस्तान युद्धांमध्ये महार रेजिमेंटने अतुलनीय शौर्य गाजवले आहे.
रेजिमेंटच्या वीर सैनिकांनी १ परमवीर चक्र, ४ महावीर चक्र, २९ वीर चक्र, २ कीर्ती चक्र, १ अशोक चक्र, परमविशिष्ट सेवा पदक आणि युद्ध सेवा पदकासह अनेक राष्ट्रीय सन्मान प्राप्त केले आहेत.
सध्या महार रेजिमेंटमध्ये २२ नियमित बटालियन, ३ टेरिटोरियल आर्मी बटालियन आणि ३ राष्ट्रीय रायफल्स बटालियन कार्यरत आहेत. त्यापैकी १७ महार बटालियन ही धाडसी आणि उल्लेखनीय कामगिरी करणारी बटालियन म्हणून ओळखली जाते. १ जुलै १९७९ रोजी मध्य प्रदेशातील मक्रोनिया येथे लेफ्टनंट कर्नल (नंतर ब्रिगेडियर) अवतार सिंग यांच्या नेतृत्वाखाली या बटालियनची स्थापना झाली.
या बटालियनने आजपर्यंत ८ सेना मेडल, ३ विशिष्ट सेवा पदके, २६ COAS व VCOAS प्रशस्तीपत्रे, नंगी टेकडी आणि ग्लेशियर क्षेत्रातील कामगिरीबद्दल २ युनिट सायटेशन तसेच १२६ कमेंडेशन कार्ड्स मिळवून भारतीय सैन्यात आपला वेगळा ठसा उमटवला आहे.
सांस्कृतिक कार्यक्रमांनी रंगला पहिला दिवस…
३० जून रोजी आयोजित स्नेहसंमेलनात माजी सैनिक आणि त्यांच्या कुटुंबीयांनी मोठ्या उत्साहाने सहभाग घेतला. विविध सांस्कृतिक कार्यक्रम, चिमुकल्यांची आकर्षक नृत्य सादरीकरणे, महिलांसाठी संगीत खुर्ची स्पर्धा आणि पारंपरिक ‘बडा खाना’ या विशेष भोजनाचा सर्वांनी आनंद लुटला. अनेक वर्षांनंतर भेटलेल्या सैनिक सहकाऱ्यांनी जुन्या आठवणींना उजाळा देत भावनिक क्षण अनुभवले.
शहीदांना मानवंदनेने मुख्य सोहळ्याची सुरुवात…
१ जुलै रोजी मुख्य कार्यक्रमाची सुरुवात सैनिक स्मारकास पुष्पचक्र अर्पण करून शहीदांना मानवंदना देण्यात आली. त्यानंतर प्रमुख पाहुण्यांच्या हस्ते दीपप्रज्वलन करण्यात आले.
उत्सव समितीचे अध्यक्ष हवालदार भरत सकट यांनी प्रास्ताविकातून कार्यक्रमाचा उद्देश स्पष्ट केला. कुमारी तन्वी भिसे आणि चि. विशाल चंदनशिवे यांनी महार रेजिमेंट तसेच भीमा-कोरेगावच्या ऐतिहासिक वारशाची माहिती प्रभावीपणे उपस्थितांसमोर मांडली.
यावेळी वीरनारी श्रीमती संगीता अशोक मस्के यांच्यासह सर्व सैनिक पत्नींचा विशेष सन्मान करण्यात आला. लहान बालके आणि ज्येष्ठ माजी सैनिक यांच्या हस्ते स्थापना दिनाचा केक कापण्यात आला. प्रमुख पाहुण्यांच्या हस्ते सर्व सदस्यांचा सत्कार करण्यात आला.
मान्यवरांची उपस्थिती…
या कार्यक्रमास प्रमुख अतिथी म्हणून मेजर डॉ. शिल्पा खरपकर (सेवानिवृत्त), उपसंचालक, प्रशासन, सैनिक कल्याण विभाग, पुणे उपस्थित होत्या. प्रमुख पाहुणे म्हणून कॅप्टन बाबू पोळके (सेवानिवृत्त), १९७१ चे वीर योद्धा यांनी उपस्थितांना मार्गदर्शन केले.
याशिवाय पि. स. ढोबळे (समता सैनिक दल), बुद्धा लक्ष्मण चव्हाण, आबासाहेब ढोले (ACE युनियन राष्ट्रीय कार्यकारिणी), महेश पवार (ACE युनियन कार्यसमिती जनरल सेक्रेटरी), मार्गदर्शक सुभेदार गजानन गवई आणि सुभेदार गुलाब मस्के यांची विशेष उपस्थिती लाभली.
यशस्वी आयोजन…
कार्यक्रमाचे सूत्रसंचालन तुळशीराम गायकवाड आणि रमेश वाघमारे यांनी केले, तर रामलाल पवार यांनी आभार प्रदर्शन केले. शेवटी सर्व उपस्थितांनी रेजिमेंटल साँग (महार गाणे) गायले. त्यानंतर ग्रुप फोटो सेशन आणि स्नेहभोजनाने दोन दिवसीय स्थापना दिन सोहळ्याची सांगता झाली.
या यशस्वी कार्यक्रमासाठी सेव्हन्टीन योद्धा माजी सैनिक संघ, महाराष्ट्र राज्य आणि उत्सव समिती २०२६ यांनी विशेष परिश्रम घेतले. समितीचे अध्यक्ष हवालदार भरत सकट, सचिव हवालदार काशिनाथ भिसे, कोषाध्यक्ष हवालदार विनोद भोजने आणि सह-कोषाध्यक्ष हवालदार किरण खिल्लारे यांच्यासह सर्व माजी सैनिक सदस्यांनी आयोजनाची जबाबदारी यशस्वीपणे पार पाडली.
स्थापना दिनाच्या निमित्ताने माजी सैनिकांनी राष्ट्रसेवा, शौर्य, त्याग आणि सामाजिक एकतेचा संदेश देत पुढील पिढीनेही देशसेवेची प्रेरणा घ्यावी, असे आवाहन केले.
Editer sunil thorat
