धक्कादायक! अमूल, गोकुळच्या पिशव्यांत अस्वच्छ पाणी मिसळून भेसळयुक्त दूध विक्री; FDA आणि गुन्हे शाखेची संयुक्त कारवाई…
मुंबई : मुंबईतील दहिसर पूर्व परिसरात नामांकित दूध कंपन्यांच्या पिशव्यांमध्ये अस्वच्छ पाणी मिसळून भेसळयुक्त दूध विक्री करणाऱ्या रॅकेटचा गुन्हे शाखेच्या कक्ष-१२ आणि अन्न व औषध प्रशासन (एफडीए) यांच्या संयुक्त कारवाईत पर्दाफाश झाला आहे. या प्रकरणी एका आरोपीला अटक करण्यात आली असून ४७० लिटर भेसळयुक्त दूध, ३२७ रिकाम्या दूध पिशव्या, भेसळीसाठी वापरले जाणारे साहित्य आणि मोबाईल फोन असा एकूण ३९ हजार ७५० रुपयांचा मुद्देमाल जप्त करण्यात आला.
गुन्हे शाखेच्या कक्ष-१२ ला मिळालेल्या गोपनीय माहितीच्या आधारे गुरुवारी पहाटे दहिसर पूर्व येथील राजेश कंपाऊंडजवळील दुबे चाळ परिसरात छापा टाकण्यात आला. कारवाईदरम्यान आरोपी अमूल ताजा, अमूल गोल्ड आणि गोकुळसारख्या नामांकित कंपन्यांच्या मूळ दूध पिशव्या कापून त्यातील काही प्रमाणात दूध काढत होता. त्यानंतर त्या पिशव्यांमध्ये अस्वच्छ पाणी मिसळून स्टोव्ह पिन व मेणबत्तीच्या साहाय्याने पुन्हा सील करून ते दूध मूळ कंपनीचे असल्याचा भास निर्माण करत ग्राहकांना विक्रीसाठी तयार केले जात असल्याचे उघड झाले.
अधिकाऱ्यांनी जप्त केलेले ४७० लिटर भेसळयुक्त दूध आरोग्यास अत्यंत घातक असल्याने ते जागीच नष्ट करण्यात आले. या प्रकरणी दहिसर पोलीस ठाण्यात भारतीय न्याय संहिता तसेच अन्न सुरक्षा व मानके कायद्यान्वये गुन्हा दाखल करण्यात आला असून पुढील तपास गुन्हे शाखेचे कक्ष-१२ करत आहे.
ही कारवाई पोलीस आयुक्त देवेन भारती, सहपोलीस आयुक्त (गुन्हे) अनिल कुंभारे, अपर पोलीस आयुक्त (गुन्हे) कृष्णकांत उपाध्याय, पोलीस उपायुक्त (प्रकटीकरण-१) नवनाथ ढवळे आणि सहाय्यक पोलीस आयुक्त (प्रकटीकरण-उत्तर) रविंद्र अडाणे यांच्या मार्गदर्शनाखाली पार पडली.
वरिष्ठ पोलीस निरीक्षक संदीप येडे-पाटील, पोलीस निरीक्षक बाळासाहेब राऊत, पूजा खांडेकर, विजय रासकर, सहाय्यक पोलीस निरीक्षक समीर मुजावर, युवराज चव्हाण, पोलीस उपनिरीक्षक किरण कोते, अजय सावंत तसेच गुन्हे शाखेचे अधिकारी-कर्मचारी आणि अन्न सुरक्षा अधिकारी तुषार पांडुरंग शेळके व त्यांच्या पथकाने या कारवाईत महत्त्वाची भूमिका बजावली.
नागरिकांच्या आरोग्याशी खेळ करणाऱ्या भेसळखोरांविरोधात अशी कठोर कारवाई सुरूच राहणार असल्याचे प्रशासनाने स्पष्ट केले असून, दूध किंवा इतर अन्नपदार्थांबाबत कोणताही संशयास्पद प्रकार आढळल्यास तातडीने पोलीस किंवा अन्न व औषध प्रशासनाला माहिती देण्याचे आवाहन करण्यात आले आहे.
Editer sunil thorat
