पार्थ पवार यांच्या लग्नाचा मुहूर्त ठरला; २९ जुलैला साखरपुडा, २७ फेब्रुवारी २०२७ रोजी बारामतीत विवाह…
पुणे, दि. २४ : राष्ट्रवादी काँग्रेसचे खासदार पार्थ पवार यांच्या विवाहाची तारीख निश्चित झाली असून, पवार कुटुंबात पुन्हा एकदा सनई-चौघडे वाजणार आहेत. २९ जुलै २०२६ रोजी पुण्यात अत्यंत साध्या आणि कौटुंबिक वातावरणात त्यांचा साखरपुडा होणार असून, २७ फेब्रुवारी २०२७ रोजी बारामती येथे विवाहसोहळा पार पडणार असल्याची माहिती समोर आली आहे.
पार्थ पवार यांच्या होणाऱ्या पत्नीबाबत विविध माध्यमांमध्ये अनेक तर्कवितर्क लावले जात होते. मात्र, त्यांच्या कार्यालयाकडून अधिकृत माहिती देत त्यांचे नाव कायनात दारा असल्याचे स्पष्ट करण्यात आले आहे. त्या मूळच्या चंदीगड येथील पंजाबी कुटुंबातील असून सध्या दिल्ली येथे वास्तव्यास आहेत. त्या काश्मिरी असल्याच्या चर्चांना यामुळे पूर्णविराम मिळाला आहे.
कायनात दारा यांनी दिल्लीतील प्रतिष्ठित द ब्रिटिश स्कूल, चाणक्यपुरी येथून शालेय शिक्षण पूर्ण केले असून, त्यानंतर लंडन स्कूल ऑफ इकॉनॉमिक्स (LSE) मधून उच्च शिक्षण घेतले आहे. त्यांनी काही काळ NDTV मध्ये आउटपुट एडिटर आणि रिपोर्टर म्हणून काम केले. सध्या त्या आपल्या कुटुंबाच्या हॉस्पिटॅलिटी आणि रिअल इस्टेट व्यवसायाची जबाबदारी सांभाळत आहेत.
पार्थ पवार आणि कायनात दारा यांची अनेक वर्षांची मैत्री हळूहळू प्रेमात बदलली आणि अखेर दोघांनी विवाहबंधनात अडकण्याचा निर्णय घेतला. खासदार सुप्रिया सुळे यांच्या कन्या रेवती सुळे यांच्या विवाहसोहळ्यातही कायनात दारा यांनी पवार कुटुंबासोबत उपस्थिती लावली होती. त्यानंतर त्यांच्या नात्याची चर्चा अधिक रंगली होती.
दरम्यान, पार्थ पवार यांच्या विवाहासंदर्भातील धार्मिक परंपरा आणि शंकांचे निरसन करण्यासाठी करवीर पीठाचे शंकराचार्य यांच्याशी सविस्तर चर्चा करण्यात आल्याचे सांगितले जात आहे. त्यानंतरच विवाहाचा मुहूर्त निश्चित करण्यात आला.
२९ जुलै रोजी पुण्यात मोजक्या नातेवाईक आणि निमंत्रितांच्या उपस्थितीत साखरपुडा पार पडणार असून, २७ फेब्रुवारी २०२७ रोजी बारामती येथे विवाहसोहळा मोठ्या उत्साहात पार पडणार आहे.
Editer sunil thorat
