गोळीबार प्रकरण चांगलेच भोवले! अधिकाऱ्यांच्या बदल्या; पोलीस आयुक्तांचा मोठा प्रशासकीय निर्णय…
पुणे : खडक पोलिस ठाण्याच्या हद्दीत शुक्रवारी अवघ्या काही तासांच्या अंतराने घडलेल्या दोन गोळीबाराच्या घटनांची गंभीर दखल घेत पुणे पोलीस आयुक्त अमितेश कुमार यांनी मोठा प्रशासकीय निर्णय घेतला आहे. या घटनांनंतर दोन पोलिस निरीक्षकांच्या बदल्या करण्यात आल्या असून, गुन्हे शाखेच्या युनिट-२ मधील अधिकारी व कर्मचाऱ्यांनाही नियंत्रण कक्षाशी संलग्न करण्यात आले आहे. या कारवाईमुळे पुणे पोलिस दलात मोठी खळबळ उडाली आहे.
मिळालेल्या माहितीनुसार, खडक पोलिस ठाण्याचे वरिष्ठ पोलिस निरीक्षक शशिकांत चव्हाण यांची नियंत्रण कक्षात बदली करण्यात आली आहे. त्यांच्या जागी वाहतूक शाखेतील पोलिस निरीक्षक धनंजय पिंगळे यांची नियुक्ती करण्यात आली आहे. तसेच खडक परिसराची जबाबदारी असलेल्या गुन्हे शाखा युनिट-१ चे पोलिस निरीक्षक अजित जाधव यांनाही नियंत्रण कक्षात हलविण्यात आले आहे. त्यांच्या जागी अद्याप नवीन अधिकाऱ्याची नियुक्ती करण्यात आलेली नाही.
शुक्रवारी घोरपडे पेठ पोलिस चौकीसमोर भरदिवसा झालेल्या गोळीबारात एका तरुणावर तीन गोळ्या झाडण्यात आल्या होत्या. त्यातील एक गोळी तरुणाला लागून तो जखमी झाला. या घटनेनंतर काही तासांतच लोहियानगर परिसरात अल्पवयीन मुलांनी हवेत गोळीबार केला, तर दुसऱ्या एका मुलावरही गोळीबार केल्याची घटना समोर आली. सलग घडलेल्या या दोन घटनांमुळे पुण्याच्या मध्यवर्ती भागातील कायदा व सुव्यवस्थेबाबत गंभीर प्रश्न निर्माण झाले होते.
दरम्यान, स्वारगेट पोलिस ठाण्यात दाखल असलेल्या खुनाच्या प्रयत्नाच्या गुन्ह्यात गोळीबारातील दोन आरोपी ‘वॉन्टेड‘ असल्याचेही तपासात समोर आले आहे. त्यामुळे स्वारगेट पोलिस ठाण्याच्या कामकाजावरही प्रश्नचिन्ह उपस्थित झाले असून, तेथील अधिकाऱ्यांवरही प्रशासकीय कारवाई होण्याची शक्यता व्यक्त केली जात आहे.
या प्रकरणाच्या पार्श्वभूमीवर पोलीस आयुक्त अमितेश कुमार यांनी केवळ खडक पोलिस ठाण्याचे नेतृत्व बदलण्यापुरतेच मर्यादित न राहता इतर काही अधिकाऱ्यांच्याही बदल्यांचे आदेश दिले आहेत. यामध्ये येरवडा पोलिस ठाण्याच्या वरिष्ठ निरीक्षक अंजुम बागवान यांची गुन्हे शाखेत बदली करण्यात आली आहे. येरवड्याचे गुन्हे निरीक्षक निळकंठ जगताप यांची लक्ष्मीनगर पोलिस ठाण्याच्या गुन्हे निरीक्षकपदी नियुक्ती करण्यात आली असून, लक्ष्मीनगरचे गुन्हे निरीक्षक उमेश गित्ते यांची येरवडा पोलिस ठाण्याच्या वरिष्ठ निरीक्षकपदी नियुक्ती करण्यात आली आहे.
सलग घडलेल्या गोळीबाराच्या घटनांनंतर गुन्हे शाखेच्या कामगिरीवरही प्रश्न उपस्थित होत असून, गेल्या काही दिवसांतील गुन्हे नियंत्रणाच्या उपाययोजनांचा आढावा घेत पोलिस प्रशासनाने कठोर भूमिका घेतल्याचे या बदल्यांवरून स्पष्ट झाले आहे. आगामी काळात अशा गंभीर घटनांना आळा घालण्यासाठी पोलिस दलात आणखी काही प्रशासकीय बदल होण्याची शक्यता वर्तवली जात आहे.
Editer sunil thorat
