हडपसर पुणे : भारतीय संस्कृतीत गुरूला ईश्वराचे स्थान दिले जाते. गुरु-शिष्य परंपरेतील आदर, कृतज्ञता आणि संस्कारांची जपणूक करण्याच्या उद्देशाने जेएसपीएमच्या जयवंतराव सावंत इन्स्टिट्यूट ऑफ फार्मसी, हडपसर येथे गुरुपौर्णिमेनिमित्त भावपूर्ण कार्यक्रमाचे आयोजन करण्यात आले. विद्यार्थी, शिक्षक आणि शिक्षकेतर कर्मचाऱ्यांच्या उत्स्फूर्त सहभागामुळे हा सोहळा संस्मरणीय ठरला.
कार्यक्रमाची सुरुवात ज्ञानदेवता माता सरस्वती यांच्या प्रतिमेचे पूजन व दीपप्रज्वलनाने झाली. जेएसपीएम हडपसर शैक्षणिक संकुलाचे संचालक डॉ. मारुती काळबांडे आणि डॉ. वसंत बुगडे यांच्या प्रमुख उपस्थितीत कार्यक्रम पार पडला. महाविद्यालयाचे प्राचार्य डॉ. प्रफुल्ल आडकर यांनी अध्यक्षस्थान भूषविले.
अध्यक्षीय भाषणात प्राचार्य डॉ. आडकर यांनी विद्यार्थ्यांना शिक्षकांकडून अधिकाधिक ज्ञान आत्मसात करून जीवनात यशस्वी होण्याचा संदेश दिला. गुरुपौर्णिमा हा केवळ उत्सव नसून संस्कार, ज्ञान आणि कृतज्ञतेचे प्रतीक असल्याचे त्यांनी सांगितले.
डी. फार्मसीच्या विद्यार्थ्यांनी संपूर्ण कार्यक्रमाचे नियोजन अत्यंत नेटकेपणाने केले. विद्यार्थ्यांनी सर्व शिक्षक व शिक्षकेतर कर्मचाऱ्यांचा फुले, मिठाई आणि भेटवस्तू देऊन सत्कार केला. विद्यार्थ्यांच्या मनोगतातून गुरूंप्रती असलेला आदर आणि कृतज्ञता स्पष्टपणे व्यक्त झाली.
यावेळी विद्यार्थिनी साक्षी नागरे हिने प्रेरणादायी मनोगत व्यक्त केले, तर दुर्गा कदम हिने सादर केलेल्या स्वरचित भावस्पर्शी कवितेने उपस्थित शिक्षकांना भावूक केले. कार्यक्रमात विद्यार्थ्यांनी शिक्षकांसाठी विविध मनोरंजक खेळांचे आयोजन केले तसेच शिक्षकांविषयी कृतज्ञता व्यक्त करणारी विशेष चित्रफीतही सादर केली.
या संपूर्ण कार्यक्रमात विद्यार्थ्यांनी दाखविलेली शिस्त, आदरभाव आणि उत्कृष्ट नियोजनाचे प्राचार्यांसह सर्व शिक्षकांनी कौतुक केले. विद्यार्थ्यांच्या उज्ज्वल शैक्षणिक आणि वैयक्तिक वाटचालीसाठी सर्व शिक्षक व शिक्षकेतर कर्मचाऱ्यांनी शुभेच्छा दिल्या.
कार्यक्रम यशस्वी करण्यासाठी डॉ. आर. आर. जाधव यांनी विद्यार्थ्यांना मार्गदर्शन केले. तसेच प्रा. अनुराधा पाटील, प्रा. स्वप्निल गाडेकर, प्रा. निकिता कोलते, प्रा. प्रगती लगदिवे, प्रा. चेतन ममडगे, स्वाती माकोने, विवेक थोरात, रूपाली शिंदे, प्रतीक्षा थोरात, स्नेहा कुंभार, प्रियांका महाजन, स्वप्नाली सावंत, पवार काका, आकांक्षा जाधव आणि ज्योती रणदिवे यांनी विशेष सहकार्य केले.
तृतीय वर्ष डी. फार्मसीच्या विद्यार्थ्यांनी कार्यक्रमाच्या यशस्वी आयोजनासाठी परिश्रम घेतले. पृथ्वी पाटील, सलोनी माने आणि सुदर्शन कांबळे यांनी सूत्रसंचालन केले. कार्यक्रमाच्या शेवटी प्रा. आर. आर. जाधव यांनी उपस्थितांचे आभार मानले. सामूहिक “वंदे मातरम्” गायनाने या मंगलमय सोहळ्याची सांगता झाली.
Editer sunil thorat
