उदय काळभोर यांच्या विशेष प्रयत्नांना यश ; आतापर्यंत १५० हून अधिक नागरिकांनी घेतला लाभ

कदमवाकवस्ती (ता. हवेली) : ग्रामस्थांच्या आरोग्याची गरज लक्षात घेऊन ग्रामपंचायत कदमवाकवस्तीच्या सौजन्याने आणि उदय काळभोर यांच्या विशेष प्रयत्नातून सुरू करण्यात आलेल्या मोफत फिजिओथेरपी व फूट पल्स सेंटरला नागरिकांचा उत्स्फूर्त प्रतिसाद मिळत आहे. आतापर्यंत १५० हून अधिक नागरिकांनी या मोफत आरोग्यसेवेचा लाभ घेतला असून, विशेषतः ज्येष्ठ नागरिकांसाठी हे केंद्र आधारवड ठरत आहे.

या केंद्रामध्ये गुडघेदुखी, कंबरदुखी, सांधेदुखी, पायांमध्ये होणारा त्रास, शरीराच्या हालचालींमध्ये अडथळा तसेच वयोमानानुसार उद्भवणाऱ्या विविध शारीरिक समस्यांसाठी फिजिओथेरपीची सुविधा उपलब्ध करून देण्यात आली आहे. विशेष म्हणजे ही सेवा नागरिकांसाठी पूर्णपणे मोफत असल्याने आर्थिकदृष्ट्या सर्वसामान्य नागरिकांनाही उपचाराचा लाभ घेता येत आहे.

वयोमानानुसार अनेक ज्येष्ठ नागरिकांना गुडघेदुखी, कंबरदुखी तसेच पायांच्या विविध समस्यांना सामोरे जावे लागते. नियमित फिजिओथेरपीसाठी शहरातील केंद्रांमध्ये जावे लागत असल्याने प्रवासाचा त्रास आणि उपचाराचा खर्च या दोन्ही बाबी अनेकांसाठी अडचणीच्या ठरत होत्या. मात्र, गावातच मोफत फिजिओथेरपी व फूट पल्स सेंटर सुरू झाल्याने ही गैरसोय मोठ्या प्रमाणात दूर झाली आहे.

नियमित थेरपीमुळे शारीरिक हालचाली सुलभ होण्यास मदत होत असून, दैनंदिन जीवनातील त्रास कमी होण्यास मदत होत असल्याचे लाभार्थी नागरिकांकडून सांगण्यात येत आहे. त्यामुळे या उपक्रमाला ग्रामस्थांकडून चांगला प्रतिसाद मिळत आहे.

गावाच्या विकासात रस्ते, पाणी, वीज यांसारख्या भौतिक सुविधांसोबतच नागरिकांचे आरोग्यही तितकेच महत्त्वाचे आहे, या भूमिकेतून हा उपक्रम राबविण्यात येत आहे. आर्थिक परिस्थितीमुळे उपचार घेण्यास अडचण येणाऱ्या गरजू नागरिकांनाही मोफत थेरपीची सुविधा उपलब्ध झाल्याने हा उपक्रम कौतुकास्पद ठरत आहे.

हा उपक्रम यशस्वी करण्यासाठी ग्रामपंचायत सदस्या राजश्री काळभोर, बिना काळभोर आणि मंदाकिनी नामुगडे यांचेही मोलाचे योगदान लाभले आहे. नागरिकांना या सुविधेची माहिती मिळावी, अधिकाधिक गरजू नागरिकांनी त्याचा लाभ घ्यावा तसेच केंद्राची सेवा प्रभावीपणे सुरू राहावी यासाठी त्यांनी सक्रिय सहभाग घेतला.

ग्रामपंचायत आणि स्थानिक पदाधिकाऱ्यांच्या समन्वयातून नागरिकांच्या आरोग्यासाठी राबविण्यात येणारा हा उपक्रम कदमवाकवस्तीच्या सामाजिक व आरोग्यविषयक विकासाच्या दृष्टीने सकारात्मक पाऊल मानले जात आहे.

२१ ऑगस्टपर्यंत मोफत सेवा

नागरिकांसाठी ही विशेष मोफत फिजिओथेरपी व फूट पल्स सेवा १० ऑगस्ट २०२६ ते २१ ऑगस्ट २०२६ या कालावधीत उपलब्ध राहणार आहे. त्यामुळे कदमवाकवस्ती तसेच परिसरातील गरजू नागरिकांनी या कालावधीत उपलब्ध असलेल्या मोफत आरोग्य सुविधेचा जास्तीत जास्त लाभ घ्यावा, असे आवाहन करण्यात आले आहे.

“निरोगी ग्रामस्थ, सक्षम गाव” या संकल्पनेला प्रत्यक्ष कृतीची जोड देणारा हा उपक्रम नागरिकांच्या आरोग्याची काळजी घेणारा आणि इतर गावांसाठीही अनुकरणीय ठरणारा उपक्रम असल्याचे ग्रामस्थांकडून सांगण्यात येत आहे.

Editer sunil thorat