मुख्यमंत्री देवेंद्र फडणवीस यांच्या संकल्पनेतून ‘महाराष्ट्र पब्लिक रिलीफ सोसायटी’ची स्थापना!
दुष्काळग्रस्तांसह गरजू रुग्णांना मिळणार मदतीचा नवा आधार; मुख्यमंत्री सहायता निधीला सामाजिक सहभागातून आर्थिक बळ...
मुंबई, दि. ३ नोव्हेंबर : राज्यातील दुष्काळग्रस्त नागरिक, नैसर्गिक आपत्तीमुळे बाधित कुटुंबे आणि आर्थिकदृष्ट्या दुर्बल घटकांतील गंभीर आजारांनी ग्रस्त रुग्णांना अधिक प्रभावीपणे मदत मिळावी, या उद्देशाने मुख्यमंत्री देवेंद्र फडणवीस यांच्या संकल्पनेतून ‘महाराष्ट्र पब्लिक रिलीफ सोसायटी’ची स्थापना करण्यात आली आहे. या नव्या उपक्रमामुळे मुख्यमंत्री सहायता निधीला सामाजिक सहभागाचे आणि आर्थिक संसाधनांचे अतिरिक्त बळ मिळणार असून, गरजू रुग्णांसह आपत्तीग्रस्त नागरिकांसाठी मदतीचे नवे दालन खुले होणार आहे.
मुख्यमंत्री सहायता निधीच्या माध्यमातून यापूर्वीही आर्थिकदृष्ट्या दुर्बल रुग्णांना वैद्यकीय उपचारांसाठी मदत केली जात होती. मात्र, गंभीर आजारांवरील महागडे उपचार, शस्त्रक्रिया आणि दीर्घकालीन वैद्यकीय उपचारांसाठी अधिक निधी उपलब्ध व्हावा, यासाठी सामाजिक दायित्वाच्या माध्यमातून अतिरिक्त आर्थिक स्रोत निर्माण करण्याची संकल्पना मुख्यमंत्री देवेंद्र फडणवीस यांनी मांडली होती. त्यानुसार या सोसायटीची स्थापना करण्यात आली आहे.
या सोसायटीच्या माध्यमातून विविध कंपन्या, सामाजिक संस्था, स्वयंसेवी संघटना आणि दानशूर व्यक्तींच्या सहकार्याने निधी उभारण्यात येणार आहे. हृदयरोग, कर्करोग, मूत्रपिंडविकार, मेंदूविकार यांसारख्या गंभीर आजारांवरील उपचार, शस्त्रक्रिया तसेच महागडी औषधे आणि वैद्यकीय साहित्य उपलब्ध करून देण्यासाठी या निधीचा उपयोग करता येणार आहे. दुर्मिळ आजारांनी ग्रस्त असलेल्या रुग्णांनाही विशेष आर्थिक मदत उपलब्ध करून देण्याचा प्रयत्न या माध्यमातून होणार आहे.
केवळ वैद्यकीय मदतीपुरतीच या सोसायटीची भूमिका मर्यादित राहणार नसून, दुष्काळ, पूर, नैसर्गिक आपत्ती आणि अन्य आपत्कालीन परिस्थितीत बाधित नागरिकांना मदत करण्यासाठीही या निधीचा वापर करता येणार आहे. संकटग्रस्त कुटुंबांना आवश्यक वस्तूंचे वितरण, दिव्यांगांसाठी कार्यरत संस्थांना आर्थिक सहाय्य, सामुदायिक आरोग्य शिबिरे, आरोग्य जनजागृती कार्यक्रम, चर्चासत्रे आणि कार्यशाळांचे आयोजन अशा विविध सामाजिक उपक्रमांनाही प्रोत्साहन दिले जाणार आहे.
मुख्यमंत्री सहायता निधी कक्षाच्या आढावा बैठकीत मुख्यमंत्री देवेंद्र फडणवीस यांनी सामाजिक दायित्वातून अतिरिक्त निधी उभारण्याच्या पर्यायांचा अभ्यास करण्याचे निर्देश दिले होते. त्यानुसार ही नवी व्यवस्था निर्माण करण्यात आली आहे. रुग्णालये, स्वयंसेवी संस्था, कंपन्या आणि सामाजिक संघटनांना एकत्र आणून गरजूंना वेळेत मदत पोहोचविण्याचे नियोजन करण्यात आले आहे.
या उपक्रमामुळे शासनाच्या मदतीसोबतच समाजातील दानशूर व्यक्ती, उद्योगसमूह आणि सामाजिक संस्थांनाही लोकहिताच्या कार्यात सहभागी होण्याची संधी उपलब्ध होणार आहे. अधिकाधिक आर्थिक संसाधने उभारून राज्यातील गरजू रुग्ण आणि आपत्तीग्रस्त नागरिकांपर्यंत मदतीचा हात पोहोचविणे, हा या सोसायटीचा मुख्य उद्देश आहे.
दरम्यान, या सामाजिक उपक्रमासाठी कंपन्या, संस्था आणि दानशूर व्यक्तींनी पुढाकार घेऊन आपले योगदान द्यावे, असे आवाहन मुख्यमंत्री सहायता निधी व धर्मादाय रुग्णालय मदत कक्षाचे प्रमुख रामेश्वर नाईक यांनी केले आहे. मुख्यमंत्री देवेंद्र फडणवीस यांच्या पुढाकारातून सुरू झालेली ही व्यवस्था आरोग्यसेवा आणि आपत्ती निवारणाच्या क्षेत्रात लोकसहभागातून मदतीची व्याप्ती वाढविण्यास महत्त्वपूर्ण ठरणार आहे.
Editer sunil thorat
