महापालिका निवडणुकीची संभाव्य तारीख जाहीर होणार ; १५ ते १७ डिसेंबरदरम्यान घोषणा अपेक्षित…
मुंबई : राज्यातील स्थानिक स्वराज्य संस्थांच्या निवडणुकांमध्ये आरक्षणाच्या मर्यादेवरून निर्माण झालेल्या परिस्थितीमुळे संपूर्ण निवडणूक कार्यक्रमात मोठा बदल होण्याची शक्यता आहे. जिल्हा परिषदेतील आरक्षणाच्या घोळामुळे निवडणुका लांबणीवर पडल्या असताना, आता महापालिका निवडणुकीचा धुरळा सर्वप्रथम उडणार असल्याचे विश्वसनीय सूत्रांचे संकेत आहेत.
आरक्षण मर्यादा न पाळल्यामुळे वेळापत्रक बदलणार…
राज्यातील ३२ पैकी तब्बल १७ जिल्हा परिषदांमध्ये ५० टक्के आरक्षणाची मर्यादा ओलांडली गेली आहे. या पार्श्वभूमीवर सर्वोच्च न्यायालयाने आयोगाला कडक शब्दांत बजावले की, मर्यादा ओलांडून निवडणुका घेता येणार नाहीत. परिणामी, १७ जिल्हा परिषदा मागे ठेवून उर्वरित १५ जिल्हा परिषदांची निवडणूक घेता येणार नसल्याने आयोगाने महापालिका निवडणुकीला प्राधान्य देण्याचा निर्णय घेतल्याची माहिती समोर आली आहे.
नागपूर आणि चंद्रपूर या दोनच महापालिकांमध्ये आरक्षण मर्यादा ओलांडली असल्याने, राज्यातील इतर बहुतांश महापालिका डिसेंबरमध्येच मतदानाला जाऊ शकतात.
१५ ते १७ डिसेंबरदरम्यान होऊ शकते घोषणा…
राज्यातील महापालिका निवडणुकांसाठी १० डिसेंबर रोजी वार्डनिहाय मतदार यादी अंतिम होणार आहे. आयोग त्याचा आढावा घेतल्यानंतर तीन ते चार दिवसांत निवडणुकीची अधिकृत घोषणा होणार आहे. आयोगातील वरिष्ठ सूत्रांच्या माहितीप्रमाणे:
➡️ महापालिका निवडणूक घोषणा – १५ ते १७ डिसेंबर दरम्यान
➡️ निवडणूक कालावधी – १५ डिसेंबर ते १० जानेवारी
सध्याच्या स्थितीत आयोगाकडे जिल्हा परिषद आणि महापालिका निवडणुका घेण्यासाठी फक्त ५० ते ५२ दिवसांचा कालावधी उरला आहे.
कोणत्या निवडणुका कधी? अंदाजे वेळापत्रक…
👉🏻नगरपरिषद व नगर पंचायत निकाल – २१ डिसेंबर
👉🏻महापालिका निवडणुका – १५ डिसेंबर ते १० जानेवारी दरम्यान
👉🏻जिल्हा परिषद व पंचायत समिती निवडणुका – ५ ते ३१ जानेवारी
राज्यातील निवडणुकांचे वेळापत्रक बदलाच्या टप्प्यावर असताना, महापालिका निवडणुकांची घोषणा आता अगदी दारात आली आहे. पुढील काही दिवसांत राजकीय वातावरण पुन्हा एकदा तापण्याची शक्यता आहे.
Editer sunil thorat
