“महाराष्ट्रात भाजप कोणत्याही कुबड्यांच्या आधारावर नाही” ; अमित शहा यांच्या वक्तव्याने महाराष्ट्राच्या राजकारणात खळबळ!
मुंबई : महाराष्ट्र भाजपच्या नवीन प्रदेश कार्यालयाच्या भूमिपूजन सोहळ्यात केंद्रीय गृहमंत्री अमित शहा यांनी केलेलं वक्तव्य सध्या राज्याच्या राजकीय वर्तुळात चर्चेचा विषय ठरलं आहे. “महाराष्ट्रात भाजप कोणत्याही कुबड्यांच्या आधारावर नाही, तर आपल्या स्वतःच्या ताकदीवर उभी आहे,” असं ठामपणे सांगून शहांनी थेट राजकीय संदेश दिला आहे.
सोमवारी मुंबईत पार पडलेल्या या कार्यक्रमाला मुख्यमंत्री देवेंद्र फडणवीस, उपमुख्यमंत्री एकनाथ शिंदे, तसेच उपमुख्यमंत्री अजित पवार यांच्यासह अनेक मान्यवर उपस्थित होते. मात्र शहांच्या या विधानामुळे युतीतील अंतर्गत समीकरणांवर नव्या चर्चांना उधाण आलं आहे.
“भाजप कार्यकर्त्यांच्या बळावर उभी आहे, कुबड्यांवर नाही” अमित शहा म्हणाले, “आज महाराष्ट्र भाजपसाठी शुभ आणि ऐतिहासिक दिवस आहे. कारण, आपल्या पक्षाने नवीन कार्यालयाचे भूमिपूजन करून एका नव्या प्रवासाला सुरुवात केली आहे. १९५० पासून ते आजपर्यंत प्रत्येक छोट्या-मोठ्या कार्यकर्त्यांच्या मेहनतीवर भाजप उभा राहिला आहे. भाजप कार्यालय म्हणजे कार्यकर्त्यांसाठी मंदिर आहे.
याचवेळी त्यांनी स्पष्ट शब्दात सांगितलं “महाराष्ट्रात भाजप कोणत्याही कुबड्यांच्या आधारावर नाही चालत, तर आपल्या विचारसरणीच्या, कार्यकर्त्यांच्या आणि संघटनेच्या ताकदीवर उभा आहे. भारतीय राजकारणात ज्या प्रकारे भाजपने स्वतःचं वेगळं स्थान निर्माण केलं आहे, तसंच महाराष्ट्रातही भाजप आता एक मजबूत राजकीय हस्ताक्षर म्हणून उभा आहे.”
“ट्रिपल इंजिन सरकार हवं” — अमित शहा यांचा नवा नारा…
आगामी निवडणुकांच्या पार्श्वभूमीवर अमित शहा यांनी कार्यकर्त्यांना सज्ज होण्याचं आवाहन करत सांगितलं “२०१४ मध्ये आपण चौथ्या क्रमांकावर होतो. आज आपण पहिल्या क्रमांकाचा पक्ष आहोत. देशातील जनता भाजपच्या स्वागतासाठी तयार आहे. पुढील निवडणुका ताकदीने लढा. मी केवळ डबल इंजिन सरकारवर समाधानी नाही, मला ट्रिपल इंजिन सरकार हवं आहे.”
या वक्तव्याने शहांनी लोकसभा, विधानसभा आणि स्थानिक स्वराज संस्थांमध्ये भाजपचं एकत्रित वर्चस्व प्रस्थापित करण्याचा स्पष्ट संदेश दिला आहे.
राजकीय वर्तुळात चर्चा : ‘कुबडी’ वक्तव्याचा अर्थ काय?
शहांचं “कुबडी” हे शब्द वापरणं हे राजकीयदृष्ट्या अत्यंत महत्त्वाचं मानलं जात आहे. कारण, सध्या महाराष्ट्रात भाजप, शिंदे गट आणि अजित पवार गट अशी तिहेरी युती सत्तेत आहे.
मात्र या वक्तव्याने भाजप स्वतःच्या बळावर निवडणुका लढण्याच्या तयारीत आहे का, असा प्रश्न उपस्थित होत आहे.
राजकीय तज्ज्ञांच्या मते, शहांचं वक्तव्य हे दोन स्तरांवर संदेश देणारं आहे (१)भाजप कार्यकर्त्यांना आत्मविश्वास देणारा संदेश, की पक्षाला कोणाची गरज नाही. (२) युतीतील मित्रपक्षांना इशारा, की भाजप आपल्या स्वतःच्या संघटनात्मक ताकदीवर पुढे जाण्याच्या तयारीत आहे.
राजकीय विश्लेषण : महाराष्ट्रातील भाजपची भूमिका बदलतेय का?
२०१४ मध्ये चौथ्या क्रमांकावर असलेला भाजप आज महाराष्ट्रातील सर्वात प्रभावी पक्ष म्हणून समोर आला आहे. अमित शहांच्या या भूमिकेने हे स्पष्ट होतं की, आगामी विधानसभा आणि लोकसभा निवडणुकीत भाजप स्वतंत्र रणनीती आखणार आहे. याचं प्रत्यंतर म्हणजे शहांनी दिलेला “ट्रिपल इंजिन सरकार” हा नवा नारा.
हा नारा केवळ घोषवाक्य नसून भाजपच्या पूर्ण सत्ता स्थापनेच्या दीर्घकालीन योजनेचं संकेतचिन्ह असल्याचं तज्ज्ञांचं म्हणणं आहे.
निष्कर्ष : महाराष्ट्रात राजकीय समीकरणांना नवीन दिशा
अमित शहांच्या या भाषणानंतर महाराष्ट्रातील राजकीय वातावरण चांगलंच ढवळून निघालं आहे. भाजप पुढील निवडणुकांसाठी सज्ज होत असताना, त्यांच्या “कुबडीशिवाय” उभं राहण्याच्या घोषणेमुळे शिंदे आणि पवार गटांनाही आपली भूमिका ठरवावी लागणार आहे. आगामी काही आठवड्यांत भाजपच्या रणनीतीत काय बदल होतो, हे पाहणं आता राज्यातील राजकारणासाठी निर्णायक ठरणार आहे.
Editer Sunil thorat
