कवडीगावात शेतजमिनीच्या वादात बाऊन्सरांचा हस्तक्षेप? जबरदस्तीने ताब्याचा प्रयत्न, मारहाण व पिकांचे नुकसान केल्याचा आरोप ; पोलिसांच्या भूमिकेवरही प्रश्नचिन्ह ?
फोटो सौजन्य : कुमार जोगदंड
कदमवाकवस्ती (ता. हवेली), दि. ३० : हवेली तालुक्यातील कवडीगाव (कदमवाकवस्ती) येथे वडिलोपार्जित शेतजमिनीच्या वादाने गंभीर वळण घेतले असून, शेतावर कथितरित्या बाऊन्सर आणून जबरदस्तीने ताबा घेण्याचा प्रयत्न, उभ्या पिकांचे नुकसान, पाण्याची पाईपलाईन तोडफोड, महिलांना धक्काबुक्की, तरुणांना मारहाण आणि जीवे मारण्याची धमकी दिल्याचा गंभीर आरोप करण्यात आला आहे. या घटनेमुळे परिसरात मोठी खळबळ उडाली असून, खाजगी जमिनीच्या वादात बाऊन्सरांचा वापर होत असल्याने कायदा-सुव्यवस्थेवरही प्रश्न उपस्थित झाले आहेत.
सविता दादासो झगडे (वय ५०) यांनी लोणी काळभोर पोलीस ठाण्यात दिलेल्या तक्रारीनुसार, त्यांचे कुटुंब गट क्रमांक ४२४ मधील सुमारे ७४ गुंठे वडिलोपार्जित शेतजमिनीची अनेक वर्षांपासून वहिवाट व ताबा सांभाळत आहे. या जमिनीसंदर्भातील फेरफार आणि मोजणीचे प्रकरण सध्या न्यायप्रविष्ट असल्याचे तक्रारीत नमूद करण्यात आले आहे.
फिर्यादीनुसार, २९ जून रोजी सकाळी त्या आणि त्यांच्या जाऊ मंगल झगडे शेतात काम करत असताना काही व्यक्ती वाहनांसह आणि कथित बाऊन्सरांसह तेथे आल्या. “ही जमीन आमची आहे, येथून निघून जा,” असे सांगत महिलांना हाताला धरून शेताबाहेर ढकलण्यात आल्याचा आरोप करण्यात आला आहे. त्यानंतर ट्रॅक्टरने उभी पिके नांगरण्यात आली, पाण्याची पाईपलाईन तोडण्यात आली आणि सिमेंटचे खांब उभारण्यात आल्याचेही तक्रारीत म्हटले आहे.
सायंकाळी पुन्हा शेतात गेल्यानंतर क्रेनच्या सहाय्याने डेमो हाऊस उभारण्याचे काम सुरू असल्याचे दिसून आले. याला विरोध करणाऱ्या हर्षल झगडे आणि प्रणव झगडे यांना कथित बाऊन्सरांनी मारहाण केली तसेच जीवे मारण्याची धमकी दिल्याचा आरोपही करण्यात आला आहे.
शेतातील वादात बाऊन्सरांचा वापर कितपत कायदेशीर?
कायदेतज्ज्ञांच्या मते, बाऊन्सर किंवा खाजगी सुरक्षा रक्षकांचे काम हॉटेल, बार, क्लब, मॉल किंवा सार्वजनिक कार्यक्रमांमध्ये सुरक्षा व्यवस्था राखण्यापुरते मर्यादित असते. खाजगी शेतजमिनीच्या वादात एका पक्षाच्या बाजूने जाऊन दबाव निर्माण करणे, धमकावणे किंवा जबरदस्तीने ताबा मिळवून देण्याचा प्रयत्न करणे हे त्यांच्या अधिकृत कामाच्या कक्षेत येत नाही.
अशा प्रकारच्या कृत्यात बेकायदेशीर प्रवेश, मारहाण, धमकी, मालमत्तेचे नुकसान किंवा जबरदस्ती झाल्याचे सिद्ध झाल्यास संबंधित व्यक्तींवर भारतीय न्याय संहितेतील (BNS) विविध कलमान्वये गुन्हे नोंद होऊ शकतात. संबंधित सुरक्षा एजन्सीची भूमिकाही तपासाच्या कक्षेत येऊ शकते.
पोलीस प्रशासनाच्या भूमिकेवर प्रश्न…
या घटनेनंतर स्थानिक नागरिकांमध्ये पोलीस प्रशासनाच्या भूमिकेबाबतही चर्चा सुरू झाली आहे. न्यायप्रविष्ट असलेल्या जमिनीवर मोठ्या संख्येने बाहेरील व्यक्ती व कथित बाऊन्सर येऊन कामकाज करत असताना त्याबाबत पोलिसांना माहिती होती का? वेळेत हस्तक्षेप का झाला नाही? अशा प्रश्नांची चर्चा परिसरात सुरू आहे.
तक्रारीनंतर पोलिसांनी घटनास्थळाचा पंचनामा, CCTV, मोबाईल व्हिडिओ, साक्षीदारांचे जबाब आणि कथित बाऊन्सरांची ओळख यांचा सखोल तपास करणे अपेक्षित असल्याचे नागरिकांचे म्हणणे आहे. तसेच संबंधित बाऊन्सर कोणत्या सुरक्षा एजन्सीचे होते, त्यांच्याकडे आवश्यक कागदपत्रे व ओळखपत्र होते का, याचाही तपास व्हावा, अशी मागणी होत आहे.
स्थानिक नागरिकांच्या मनात संशय…
या प्रकरणात कथित बाऊन्सरांचा वापर नेमका कोणाच्या निर्देशावर झाला? संबंधित सुरक्षा एजन्सी अधिकृत होती का? वाद न्यायप्रविष्ट असताना शेतात मोठ्या प्रमाणावर यंत्रसामग्री आणि बाहेरील व्यक्तींना प्रवेश कसा मिळाला? अशा अनेक प्रश्नांमुळे स्थानिक नागरिकांच्या मनात संशय निर्माण झाला आहे.
नागरिकांचे म्हणणे आहे की, अशा घटनांवर तातडीने आणि निष्पक्ष कारवाई झाली नाही, तर भविष्यात जमीनविषयक वादांमध्ये खाजगी बळाचा वापर वाढण्याची भीती निर्माण होऊ शकते. त्यामुळे या संपूर्ण प्रकरणाचा निष्पक्ष, पारदर्शक आणि सर्वंकष तपास करून सत्य समोर आणण्याची मागणी जोर धरत आहे.
दरम्यान, लोणी काळभोर पोलीस या प्रकरणाचा तपास करत असून, संबंधित सर्व पक्षांची बाजू, उपलब्ध पुरावे आणि कायदेशीर बाबींचा विचार करून पुढील कारवाई केली जाणार असल्याची माहिती पोलिसांकडून देण्यात आली आहे.
(टीप : या वृत्तातील सर्व आरोप तक्रारदाराच्या फिर्यादीवर आधारित असून, त्यांची सत्यता तपासाच्या अधीन आहे. संबंधित व्यक्तींची बाजू समोर आल्यास तीही प्रसिद्ध करण्यात येईल.)
Editer sunil thorat
