“नो पीयूसी – नो फ्युएल” : महाराष्ट्र सरकारचा मोठा निर्णय, परिवहन मंत्री प्रताप सरनाईक यांचा आदेश – पेट्रोल पंपांवर वैध PUC नसल्यास वाहनांना मिळणार नाही पेट्रोल-डिझेल…
मुंबई : महाराष्ट्रातील वाहनचालकांसाठी महत्त्वाची बातमी समोर आली आहे. राज्याचे परिवहन मंत्री प्रताप सरनाईक यांनी प्रदूषण रोखण्यासाठी ऐतिहासिक निर्णय घेतला आहे. आता वैध PUC (प्रदूषण नियंत्रण प्रमाणपत्र) नसेल तर कोणत्याही वाहनाला पेट्रोल किंवा डिझेल मिळणार नाही. “नो पीयूसी – नो फ्युएल” हा उपक्रम लवकरच संपूर्ण राज्यात सक्तीने लागू केला जाणार आहे.
पेट्रोल पंपांवर कडक अंमलबजावणी…
प्रताप सरनाईक यांनी परिवहन आयुक्त कार्यालयात आयोजित बैठकीत सांगितले की, प्रत्येक पेट्रोल पंपावर सीसीटीव्ही कॅमेऱ्यांच्या मदतीने इंधन भरण्यासाठी येणाऱ्या वाहनांचा क्रमांक स्कॅन केला जाईल. यामुळे वाहनाचे PUC वैध आहे की नाही हे लगेच कळेल. जर वाहनाचे PUC वैध नसेल तर त्याला इंधन दिले जाणार नाही.
तथापि, वाहनचालकांची गैरसोय होऊ नये यासाठी त्या पंपावरच त्वरित PUC काढून घेण्याची व्यवस्था करण्यात येणार आहे. या PUC ला एक युनिक आयडेंटी (UID) असणार असून त्याची वैधता वेळोवेळी तपासली जाऊ शकते.
पर्यावरण रक्षणासाठी कठोर पावले…
मंत्री सरनाईक म्हणाले,
> “भविष्यातील पिढीला प्रदूषणमुक्त वातावरण देण्यासाठी आजच्या पिढीने काही निर्बंध पाळले पाहिजेत. वैध PUC हे प्रत्येक वाहनासाठी बंधनकारक आहे. अवैध पद्धतीने PUC प्रमाणपत्र काढणाऱ्यांविरोधात मोठी धडक मोहीम राबवली जाईल.”
यासोबतच, वाहन विक्री करणाऱ्या शोरूम आणि वाहन दुरुस्ती गॅरेजमध्येही PUC देण्याची सोय केली जाणार आहे. यामुळे रस्त्यावर चालणारे प्रत्येक वाहन प्रदूषण नियंत्रण नियमांचे पालन करणारे असेल.
अवैध प्रमाणपत्र देणाऱ्यांवर कारवाई…
सध्या राज्यात अनेक ठिकाणी बनावट किंवा अवैध पद्धतीने PUC देणाऱ्या टोळ्यांचा उच्छाद आहे. त्यावर आळा घालण्यासाठी परिवहन विभागाने मोठ्या प्रमाणावर तपासणी मोहीम राबवावी, असे निर्देशही मंत्री सरनाईक यांनी दिले.
बैठकीतील इतर महत्त्वाचे निर्णय…
या बैठकीत परिवहन भवन बांधकाम, परिवहन विभागाच्या कार्यालयात आगीची पूर्वसूचना देणारी यंत्रणा बसविणे आदी महत्त्वाच्या बाबींचा देखील आढावा घेण्यात आला.
वाहनचालकांमध्ये खळबळ…
सरकारच्या या निर्णयामुळे वाहनचालकांमध्ये खळबळ उडाली आहे. मात्र पर्यावरण रक्षणासाठी हा निर्णय अत्यंत महत्त्वाचा ठरणार असल्याचे पर्यावरणप्रेमींचे म्हणणे आहे.
Editer Sunil thorat
